Prezidente Repúblika, Francisco Guterres Lú Olo bainhira vizita Klínika Kurasaun iha RAEOA, Segunda (26/3) dadér. Imajen Ajénsia Tatoli/Xisto Freitas

OE-CUSSE, (TATOLI)—Iha tempu besik ne’e, Autoridade Rejiaun Administrativa Espesiál Oe-Cusse Ambeno (RAEOA) sei hahú tan konstrusaun parte daruak nian ba Klínika Kurasaun.

“Loloos konstrusaun ba parte daruak nian hahú ona iha tinan rua liu-ba (2017-2018), maibé la konsege tanba ita la’o ho orsamentu duo-désimu”, informa responsavel Klínika Kurasaun RAEOA,  Daninha Coelho, ba jornalista sira iha Aeruportu Internasionál Rota do Sândalo, RAEOA, Segunda (26/3/2019).

Konstrusaun fíziku parte daruak nian ba Klínika Kurasaun atu atinje mak sala internamentu, emerjénsia, no intervensaun sirurjia nian.

Iha faze dahuluk ne’ebé hahú ona husi aspetu rekursu umanus nian maka iha doutór timoroan na’in rua ne’ebé oras ne’e tuir formasaun ba ekardilojia (kurasaun) iha Coimbra, Portugal, no iha mós doutór (serurjiaun) ne’ebé tuir formasaun kona-ba oinsá halo sirurjia karditorásika.

“Ita mós iha infermeiru ida ne’ebé dedika loos de’it ba kurasaun ninian na’in rua. Iha tempu badak ne’e, ami atu hahú mós área ida ne’ebé maka ita bolu dehan labele intervensaun ka labele invazivu hanesan halo ekógrafu, halo prova desporsu no ezame sira ne’ebé maka haree ita nia kurasaun husi liur, ne’ebé la presiza tama iha laran”, hateten Daninha.

Klínika Kurasaun ne’e fasilita mós Unidade Móvel hodi fó konsulta kada semana ba populasaun iha área rurál hodi halo atendimentu ba sirurjia, labarik, internamentu no inan isin rua sira.

Daninha informa mós katak, Klínika Kurasaun nia atendimentu la’ós atu simu de’it pasiente husi Timor, maibé simu mós pasiente husi nasaun viziñu Indonézia ne’ebé ho kritéria tenke kobre administrasaun no ba timoroan sei halo tratamentu ho gratuita.

Prezidente Repúblika, Francisco Guterres Lú Olo, bainhira vizita klínika refere hateten katak klínika ne’e ho fasilidade ne’ebé kualidade no modernu, tan ne’e husu ba espesialista sira atu aproveita fasilidade hirak ne’e para atende pasiente sira ho dignu no kualidade.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here