Prezidente Repúblika, Francisco Guterres Lú Olo, akompaña husi Primeiru-Ministru, Taur Matan Ruak, kaer-liman ho Komandante Jerál PNTL foun, Komisáriu Faustino da Costa, hafoin simu pose iha Sentru Formasaun Akademia Comoro, Kuarta, 27 marsu 2019. Imajen António Gonçalves

DILI, (TATOLI) – Prezidente Repúblika, Francisco Guterres Lú Olo, husu ba Komandante Jerál, Komisáriu Faustino da Costa, no Segundu Komandante, Komisáriu Mateus Fernandes, atu asume konfiansa ne’e ho responsabilidade hodi garante pás no estabilidade ba Nasaun no povu.

“Uluk-liu ha’u hakarak hatete lia-fuan balun atu enkoraja Ita-Boot. Enkoraja atu prosesu reforma no modernizasaun ba ita-nia Forsa no Servisu Seguransa, ho Polísia Nasionál nu’udar instituisaun prinsipál bele hala’o ho hakmatek no laran-metin, haree ba  interese seguransa Nasaun nian”, Xefe Estadu iha ninia diskursu durante serimónia toma pose ba lideransa foun PNTL durante selebrasaun aniversáriu PNTL ba dala XIX iha Sentru Formasaun Polísia Komoro, ohin.

Lu Olo fó konfiansa tomak ba komisáriu foun atu ezerse ninian funsaun hamutuk ho ninia ierarkia tomak hodi fó seguransa ba povu no Nasaun.

Xefe Estadu rekoñese progresu durante tinan 19 iha instituisaun hanesan garante pás no estabilidade.

“Progresu maka ita ninia instituisaun ne’e moris, progresu ida tan maka prestasaun servisu ba ita ninia komunidade, biar ida rua komete indixiplina, en jerál PNTL la’o ba oin”, dehan tan.

Kona-ba planu mudansa ba PNTL iha 2019, Lu Olo afirma Estadu apoiu liuliu atu halo mudansa iha konseitu estratéjiku defeza seguransa atu oinsá kna’ar loloos PNTL hodi kumpre sira nia misaun.

Iha Estadu-Direitu-Demokrátiku, nia akresenta seguransa sai hanesan direitu fundamentál sidadaun nian  no obrigasaun importante ida ba Estadu, tanba ne’e Estadu tenke garante seguransa maibé tenke tanen aas nafatin ema ninia direitu fundamentál sira.

Sidadaun, nia salienta iha devér atu servisu hamutuk ho autoridade  seguransa sira hodi garante seguransa nasionál.

Lu Olo subliña Estadu tenke rekoñese mós problema prinsipál sira-ne’ebé iha, hanesan krime organizadu no ekonómiku-finanseiru, krime-en-jerál, korrupsaun, terrorizmu.

Estadu tenke iha lideransa forte hodi dirije reforma polítika atu hetan modelu polísia nasionál ida ne’ebé ita hotu hakarak, ne’ebé nakfilak estrutura servisu polísia nian no foti mós prátika polisiál foun, katak tan.

Nia dehan presiza haree fali Estratéjia Seguransa Interna ne’ebé hatuur Konseitu Estratéjiku Defeza no Seguransa Nasionál, atu hatudu loloos kna’ar Forsa no Servisu Seguransa iha ámbitu sistema Seguransa Nasionál ida ne’ebé luan liután, tuir prinsípiu servisu hamutuk no tulun malu atu tanen ita-nia Sistema Defeza Nasionál.

“Ita hakarak halo reforma ba sistema polísia nian tuir ita-nia kondisaun rasik no  haree liuliu ba sidadaun maibé  ita presiza  haree mós ba saída mak ita hakarak halo aban bairua,  saida mak ita sei presiza halo hodi hatán ba krime no inseguransa, atu hamenus burokrasia, atu habesik relasaun polísia ho sidadaun no hadi’a relasaun  entre entidade governamentál sira”, tenik tan.

Nune’e mós Polísia tenke hatudu respeitu ba Direitu ema-nian,  hakbesik-an ba komunidade sira no autór sosiál sira, ko’alia ho sira hodi hetan konfiansa.

Ita presiza hamosu sentimentu konfiansa entre polísia no sidadaun sira. Ita bele dehan katak sidadaun sira ladún hatene saída loos mak polísia, sá knaar mak Ita-Boot sira halo  no oinsá hala’o, tenik.

Nia realsa modelu polisiamentu preventivu, ho kualidade, tuir prinsípiu hakbesik-an ba ema, mak dalan di’ak liu hodi hatán ba dezafiu hirak-ne’e. Maibé la’ós ida-ne’e de’it.

Inseguransa la’ós de’it problema Polísia maibé  problema  ida mós ba sosiedade no ba sivilizasaun. Sidadaun ne’ebé ajuda iha seguransa, bele tulun polísia hodi rezolve problema inseguransa no krime, konklui.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here