Prezidente Repúblika, Francisco Guterres Lú Olo, kuda aikameli nia oan iha área Aeruportu Internasionál Rota Sândalo. Imajen Ajénsia Tatoli/Xisto Freitas

OE-CUSSE,(TATOLI)—Prezidente Repúblika, Francisco Guterres Lú Olo, hamutuk ho nia estrutura hanesan Xefe Kaza Sivíl, Xefe Kaza Militár, asesór sira no  funsionáriu Palásiu Prezidénsia Repúblika, Segunda (26/3/2019),  simbólikamente kuda ai-oan iha Rejiaun Administrativa Espesiál Oe-Cusse Ambeno (RAEOA) espesiálmente iha área Aeroportu Internasionál Rota do Sândalo, nudár esforsu ida atu introdús programa kuda ai-oan.

Ai-oan sira ne’ebé PR Lú Olo ho nia ekipa kuda iha area refere mak ai-kameli hun 18 ho objetivu atu hamatak area aeroportu no mós atu satan udan-been para labele estraga rai.  Tuir planu, iha tempu besik,  Prezidénsia Repúblika sei kuda mós ai-oan rihun ba leten ne’ebé la’ós de’it ai-kameli, maibé nuu, mahoni, sabraka no seluseluk tan iha RAEOA.

 “Kuda ai-oan ne’e halo parte ba ha’u nia programa. Maibé, Oe-Cusse ne’e ai barak. Oe-Cusse, sidade ida ne’ebé iha ninia pulmaun rasik, katak iha ai-laran tuan no iha natar ne’ebé halo furak no halo matak sidade”, afirma PR Lú Olo.

Hafoin kuda ai-oan ramata, Prezidente Repúblika ho nia komitiva hamutuk ho Prezidente RAEOA, Mari Alkatiri, halo pasa revista ba aeroportu Rota do Sândalo.  Biban ne’e, Xefe Estadu rekoñese katak, aeroportu ne’e bainhira hateke ba laran no li’ur furak duni no kualidade.

PR Lú Olo, fó parabens ba prezidente RAEOA ho nia estrutura, ne’ebé halo serbisu durante tinan haat de’it, maibé konsege halo Oe-Cusse sai nabilan no husu ba estrutura  atu kontinua hametin produtividade serbisu ne’e iha RAEOA. 

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here