Produtu lokál sira iha merkadu Taibesi. Imajen/ Google

DILI,(TATOLI) – Ladún iha pro-ativu partisipasaun nivel ministru ni’an iha enkontru Konsellu Nasionál Seguransa Alimentár Timor-Leste (KONSANTIL), sai hanesan dezafiu ida atu asegura implementasaun servisu no politika  seguransa ai-han no nutrisaun.

Xefe Departamentu Seguransa Ai-han no Sekretariadu KONSANTIL, Rofino Soares Gusmão, hateten, dezafiu KONSANTIL nian durante ne’e maka ministru sira ladún partisipativa iha enkontru hodi ko’alia kona-ba seguransa ai-han no nutrisaun, enkuantu diretór nasionál no tékniku sira la’o di’ak.

“KONSANTIL estabelese iha 2012 to’o 2019 iha Ministériu Agrikultura no Peska nia okos, uainhira iha enkontru ruma ministru sira ladún marka prezensa, maibé diretór nasionál ho tékniku sira efetivu loos”, informa Rofino Gusmão ba jornalista sira, ohin,  hafoin halo reuniaun ho diretór jerál no parseiru dezenvolvimentu  nasionál no internasionál, ne’ebé hala’o  iha salaun sosiedade sivíl, Palásiu Governu.

Husi dezafiu ne’e, MAP husu ba Primeiru Ministru, Taur Matan Ruak, atu estabelese sekretariadu KONSANTIL hodi tutela iha Gabinete PM, atu nune’e Xefe Ezekutivu bele fó orientasaun imediatu ba membru governu sira hodi fó atensaun ba seguransa ai-han no nutrisaun.

Rofino informa katak, sorumutuk ida ne’e importante tebes ba ministériu sira no parseiru dezenvolvimentu, tanba iha pontu haat ne’ebé importante hodi ko’alia, mak hanesan  dahuluk haree ba estatutu KONSANTIL ne’ebé liga ba rezolusaun governu nian ba intervensaun asuntu seguransa ai-han no nutrisaun, daruak ko’alia kona-ba estratéjia no polítika ne’ebé liga ba seguransa ai-han no nutrisaun no haree ba oinsá maka bele armoniza polítika atu sai matadalan, nune’e tékniku sira bele implementa, da-toluk maka oinsá grupu tékniku sira ne’ebé harii ona liuhusi kada liña ministerial atu bele halo asaun ruma kona-ba seguransa ai-han no nutrisaun, ikus liu ko’alia kona-ba atu halo análize ba lakuna nutrisaun nian ba situasaun seguransa ai-han no nutrisaun.

Nia konsidera katak, atividade importante hirak ne’e maka bele redús mal nutrisaun iha Timor-Leste, enkuantu iha fulan kotuk MAP hamutuk ho KONSANTIL prodús ona relatóriu ida naran IPC ka klasifikasaun ba komunidade sira ne’ebé afetadu ba inseguransa alimentár.

Antes ne’e,  Ministru Agrikultura no Peska (MAP), Joaquin Gusmão, akresenta kona-ba atividade KONSANTIL nian tenke iha koordenasaun ho ministériu sira hanesan  MAP, Ministériu Saúde, Ministériu Solidariedade Sosiál no Inkluzaun, Ministériu Edukasaun (ME), Ministériu Komérsiu Indústria no Ambiente, Ministériu Finansa, Ministériu Obras Públika, Ministériu Administrasaun Estatál no Sekretária Estadu Formasaun Profisionál no Empregu.

Iha semana oin, Ministru Joaquim Gusmão, sei aprezenta estatutu KONSANTIL nian ba Konsellu Ministru atu bele  hetan aprovasaun.

Jornalista: Zezito Silva

Editór: Francisco Simões

 

 

HAKEREK NO HATÁN

Please enter your comment!
Please enter your name here