Ministra Finansa en ezersísiu, Sara Lobo Brites. Imajen Egas Cristovão

DILI, (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira, informa governu liuhosi enkontru Konsellu Ministru (KM), ohin aprova proposta atu estabelese komisaun interministeriál ba reforma fiskál no jestaun finansa públika.

Proposta rezolusaun Governu ne’e aprezenta husi Ministra Finansa en ezersísiu, Sara Lobo Brites.

“Ne’e uluk halo ona aprezentasaun, ohin Ministra Finansa aprezenta proposta konkreta hodi hetan aprovasaun”, Ministru Hermenegildo ba jornalista sira iha Palásiu Governu hafoin soru-mutu KM.

Vise-Ministra Finansa, Sara Lobo Brites, haktuir Ministériu Finansa (MF) aprezenta filafali hodi reativa rezolusaun ne’e no reforma ne’e la’ós ba reforma fiskál de’it, maibé mós ba jestaun finansa públika.

“Ko’alia kona-ba reforma jestaun finansa públika ne’e Ministériu Finansa maka iha duni papél, mas abranje iha Governu tomak, tanba utiliza osan Estadu nian ne’ebé reforma finansa públika ne’e nia elementu maka reforma iha orsamentu, aprovizionamentu, kontrolu no monitorizasaun”.

Sara salienta hirak ne’e hotu hola parte iha reforma jestaun finansa públika inklui tributária no aduaneira.

Kona-ba kriasaun komisaun interministeriál ne’e fó dalan halo promesa polítika foun ba programa reforma fiskál no jestaun finansa públika ne’ebé maka hahú iha Governu Konstitusionál Daneen.

Nia dehan reforsa papél no envolvimentu husi membru Governu ho responsabilidade, domíniu ne’e objetivu to’o 2023 sei elabora parte signifikativa husi lejizlasaun ne’ebé presiza iha matéria.

Governu reafirma kompromisu ne’ebé asume iha programa ne’e rasik ho forma komprensiva iha área finansa públika hodi haree katak bele aumenta reseita Estadu, fortalese no promove sustentabilidade, kualidade, transparénsia, no responsabilidade iha polítika fiskál no jestaun finanseira.

Komisaun ida ne’e sei lidera husi Primeiru-Ministru, Taur Matan Ruak, ne’ebé maka sei servisu hamutuk ho ministru ne’ebé responsavel ba área finansa, koordenasaun asuntu ekonómiku, reforma lejizlativa, administrasaun estatál, planeamentu investimentu estratéjiku, petróleu no minerál.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here