Iha delta Maria Rodrigues. Imajen/Espesiál.

DILI,(TATOLI) –Eis Sekretáriu Estadu Igualdade Jéneru, Idelta Maria Rodrigues, Tersa horiseik, iha Palaçio Governu, aprezenta modelu dezenvolvimentu rural (Saemaul Undong) ba Primeiru Ministru, Taur Matan Ruak.

“Ha’u mai aprezenta ba Primeiru Ministru modelu dezenvolvimentu rural ho esperiénsia Korea Súl, Saemaul Undong, ne’ebé ema bolu dehan modelu dezenvolvimentu rurál”,  hateten  Idelta Rodrigues, ba jornalista  hafoin hasoru malu ho PM Taur Matan Ruak.

Idelta hateten, modelu dezenvolvimentu Korea Súl nian importante mai Timor-Leste nu’udar referénsia, tanba durante ne’e Timor-Leste halo ona dezenvolvimentu, maibé seidauk konkista povu hodi halo redusaun ki’ak.

Tuir nia haree, modelu dezenvolvimentu tenke husi kraik ba leten ho dezenvolvimentu ne’ebé integradu, la’ós parte ekonomia de’it maibé setór hotu importante.

“Ita hatene katak durante ne’e ita iha programa barak ne’ebé implementadu, hanesan pakote referendum, PNDS, PDID, hirak ne’e hotu ita halo ona, maibé tanba sá maka ita seidauk hetan rezultadu di’ak”, Idelta realsa.

Nia esklarese katak, Saemaul Undong hanesan úniku modelu ne’ebé koñesidu iha mundu, kona-ba implementasaun dezenvolvimentu rurál, no nasaun barak maka aplika tuir ida-idak nia kontestu rai laran,  no ba kontestu Timor-Leste la aplika Saemaul Undong tomak, maibé haree ba prátika pozitivu hirak ne’ebé maka kondíz iha Timor-Leste.

Idelta Rodrigues mós sei aprezenta  modelu dezenvolvimentu rurál ne’e iha reuniaun Konsellu Ministru, iha semana oin. 

Jornalista: Zezito Silva

Editór: Francisco Simões

 

HAKEREK NO HATÁN

Please enter your comment!
Please enter your name here