Ministra Finansa ein ezersísiu, Sara Lobo Brites. Imajen/Egas Cristovão

DILI,(TATOLI)—Governu Timor-Leste, liuhusi Ministériu Finansa (MF) hamutuk ho Banku Sentrál Timor-Leste (BCTL-sigla portugés) no Timor Gap, konklui ona prosesu no prontu ona atu transfere osan millaun US$650 hodi sosa asaun ConocoPhillips ho Shell.

Governu Timor-Leste hein de’it ona husi parte ConocoPhillips ho Shell atu informa para governu bele halo ona transferénsia.  “Prezidente Timor Gap iha nia entrevista lubuk ida ne’ebé maka nia informa mós katak, to’o agora seidauk bele transfere tanba hein hela prosesu balun husi parte joint venture sira, husi Conoco ho Shell ne’ebé maka sira mós iha kestaun balun, sira-nia parte tenke clearance  tiha lai depois maka ita foin bele transfere, ne’e maka hein hela”,  informa Ministra Finansa (MF) ein ezersísiu,  Sara Lobo Brites, ohin, iha iha Palásiu Governu.

Vise Ministra Sara Lobo Brites, hateten, kuandu pedidu husi Timor Gap katak, Conoco ho Shell hetan ona clearance, maka Governu sei transfere osan.

Kona-ba informasaun balun ne’ebé hateten, bainhira la selu lalais sei hetan penalidade, Ministra Finansa ein ezersísiu ne’e dehan, ida ne’e loos tuir saida maka fó sai iha kontratu ne’ebé estabelese entre Governu ho Conoco no Shell.

“Ita haree asuntu atrazu ne’ebé maka karik iha loron 31 maka seidauk selu, ne’e la’ós atrazu husi Governu ona, ne’e atrazu husi parte terseiru (Conoco ho Shell) ne’ebé maka to’o agora ami hein hela sira atu informa mai bainhira maka prontu atu transfere”, afirma Sara Lobo Brites, hodi aprofunda tan katak, bainhira atrazu ne’e husi parte terseiru maka Governu sei la hetan penalidade ida.

“La’ós ita mak atraza prosesu. Governu nia obrigasaun atu kumpre saida maka iha kontratu, se atraza husi parte terseiru nian hanoin Governu sei la hetan penalidade ruma”, Sara Lobo hateten.

Vise Ministra klarifika tan katak husi Governu nia parte konklui prosesu hotu ona no bainhira atrazu akontese karik ne’e Governu la hetan sujeitu ba multa ruma, tanba ne’e hein husi parte Conoco ho Shell nian clearance ona Governu transfere.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here