Primeiru-Ministru, Taur Matan Ruak, ohin prezide reuniaun Konsellu Ministru iha Palásiu Governu. Imajen Mídia GPM

DILI, (TATOLI ) – Governu Timor-Leste liuhosi enkontru Konsellu Ministru, ohin diskute no aprova rezolusaun hodi fó doasaun ba vítima dezastre naturál Siklon Idai iha Mosambike ho milliaun dolar amerikanu ida.

“Konsellu Ministru rona rezolusaun ne’ebé preparadu husi Prezidénsia Konsellu Ministru no aprova rezolusaun ne’e ho osan milliaun dolar amerikanu ida hodi fó apóiu ba ita nia maun-alin sira ne’ebé mak sai vítima ba dezastre naturál, no mós fó apóiu ba Governu Mosambike”, katak Ministru Estadu no Prezidénsia Konsellu Ministru, Hermenegildo Augusto Cabral Pereira, ba jornalista sira hafoin reuniaun ezekutivu remata iha Palásiu Governu.

Siklon Idai ne’ebé akontese iha loron 15 marsu, lori sofrimentu boot ba ema ua’in iha Mosambike ne’ebé afeta to’o Zimbábue, Malawi no mós destroi infraestrutura sira iha fatin barak.

Tuir dadus provizóriu ikus iha vítima 450 mak mate iha Mosambike, ema nain 1.700 mak kanek no nain 100 dezalojadu.

Antes ne’e Prezidente Repúblika (PR), Francisco Guterres Lú Olo, lori povu Timor-Leste nia naran hato’o ona solidariedade no kondolénsia ba povu Mosambike, tanba ema barak lakon vida no barak husik hela sira nia hela fatin tanba destruisaun husi Siklon Idai.

Nune’e mós Parlamentu Nasionál (PN) liuhosi sesaun plenária fó votu solidaridade ba vítima Siklon Idai ho rezultadu unanimidade a favór 52.

Biban ne’e reprezentante povu sira rekomenda ba Governu hodi buka mekanizmu disponivel hodi fó apoiu ba Governu Mosambike.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here