iklan

EKONOMIA, EDUKASAUN

Konta Bankária Ha’u-Nia Futuru Atinje Ona Rihun 15

Konta Bankária Ha’u-Nia Futuru Atinje Ona Rihun 15

Foto BSTL.

DILI, (TATOLI) – Responsavel ba programa poupansa nian husi Banku Sentrál Timor-Leste (BSTL), Ana Paula Amaral, informa konta Bankária “Ha’u-Nia Futuru” dezde lansamentu iha 2015 to’o janeiru 2019 atinje ona rihun 15 ba leten ho osan montante milliaun $3.

Númeru ida ne’e atinje tanba BSTL iha inísiu lansamentu hahú halo kampaña hamutuk ho banku komersiál sira ba programa ne’e.

“Ida ne’e ba inan-mana sira oinsá labele gasta arbiru, bele hanoin ona rai osan ba sira-nia oan nia futuru. Redús gastu ba buat sira ne’ebé la importante, komesa rai saida maka ita prepara ba oan nia futuru”, Ana Paula hatete iha Banku Nasionál Ultramarinu (BNU) ohin bainhira lori estudante sira husi Eskola Bázika Sentrál Faról vizita banku refere iha ámbitu realiza atividade Global Money Week no Roads Show ba programa Edukasaun Finanseira.

Tanba ne’e BSTL hanoin atu halo sensibilizasaun ba inan-aman sira, ba profesór sira liuhusi alunu kona-ba produtu “Ha’u-Nia Futuru”.

Responsavel ne’e dehan konta ba “Ha’u-Nia Futuru” ne’e bele loke bainhira labarik sei iha idade 0-17 depois labarik sira atinje tinan 17 ne’e bele halo movimentu ba sira-nia konta rasik, maibé tranzmite osan husi konta labarik ba fali konta normál.

“Mas durante husi períodu tinan 0 to’o 17 sira labele halo movimentu, inan-aman sira mós labele halo movimentu ba konta bankária ne’e, só labarik rasik tanba konta ne’e labarik rasik”, nia dehan.

Nia hatutan kona-ba produtu “Ha’u-Nia Futuru” ne’e banku hotu-hotu oferese loke konta ho de’it dolar ida ho nia funan porsentu 1.5 kada tinan.

Iha entrevista antes ho Governadór BSTL, Abraão de Vasconcelos, hatete vantajen husi produtu poupansa “Ha’u-Nia Futuru” la’ós de’it ba labarik sira, maibé inan-aman kuandu hahú agora hasai osan hodi tau iha konta oan sira-nia maka sei garante futuru no ida ne’e maka BSTL hakarak eduka populasaun.

“Objetivu programa ne’e maka hakarak eduka ita-nia oan sira aban-bainrua sira boot ne’e, sira iha ona responsabilidade ba sira-nia destinu finanseiru rasik labele depende nafatin ba inan-aman”.

Programa konta “Ha’u-Nia Futuru” ne’e lansa husi BSTL iha 28 agostu 2015 atu enkoraja labarik sira hodi deskobre benefísiu hodi rai osan iha banku no haree rasik sira-nia depózitu ne’e sai hanesan kontribuisaun ne’ebé kle’an no interese atu hasa’e liután balansu.

Benefísiu sira sei tau ba konta labarik nian no sei la halo kobransa husi parte banku nian tanba selu impostu sei la aplika ba konta hanesan ne’e no sei hetan tan funan taxa merkadu.

Notísia relevante : http://www.tatoli.tl/2017/09/total-konta-poupansa-hau-nia-futuru-kuaze-liu-millaun-ida/

Jornalista: Maria Auxiliadora

Editora: Rita Almeida

iklan
iklan

Leave a Reply

iklan
error: Content is protected !!