Diretór INAP, Agostinho Letencio de Deus. Imajen/Egas Cristovão

DILI,(TATOLI)-Atu eleva di’ak liu tan koñesimentu no abilidade Funsionáriu Públiku (FP) sira nian, maka Institutu Nasionál ba Administrasaun Públiku (INAP-sigla Portugés)   prefere atu tinan-tinan fó formasaun ba funsionáriu rihun resin.

Diretór Jerál INAP, Agostinho Letencio de Deus  hateten, intensaun husi formasaun ne’e atu hasae koñesimentu funsionáriu públiku sira nian atu  bele kontribui  hadi’a atendimentu públiku.

Iha tinan 2016, INAP fó ona formasaun ba funsionáriu públiku pruvolta ema 3.000 no iha fali tinan 2017 númeru formadores sira tuun tanba enfrenta hela situasaun polítika ne’ebé afeta ba orsamentu.

Iha fali tinan 2018, INAP fasilita hikas formasaun ba funsionáriu 2.000- resin. Ho nune’e,  INAP sei kotinua nafatin formasaun ida ne’e tinan-tinan ba oin.

“INAP harii desde tinan 2000 to’o 2004, formasaun ladún barak, maibé hahú husi tinan 2004 mai to’o agora bele atinje 1.000 to’o 3.000,” informa Diretór Jerál INAP hodi responde Ajénsia TATOLI, ohin, iha Otél Timor, Dili.

Formasaun ne’ebé durante ne’e lao fahe ba formasaun obrigatóriu ka kursu indusaun, Formasaun téknika hanesan Finansa, Lideransa, jestaun eskritóriu  no formasaun formal liuhusi programa bolsu estudu.

“Ba 2019, ami foku liu ba formasaun lideransa tantu lideransa ba administrasaun lokál ka desentralizasaun ka formasaun lideransa iha nivel nasionál”,  hateten Agostinho de Deus.

http://www.tatoli.tl/2019/03/inap-define-kategoria-haat-ba-formasaun-lideransa/

Jornalista: Agapito dos Santos

Editór: Francisco Simões

 

HAKEREK NO HATÁN

Please enter your comment!
Please enter your name here