Diretór INAP, Agostinho Letencio de Deus. Imajen Egas Cristovão

DILI, (TATOLI) – Governu Japaun liuhosi ninia projetu Japan Development Scholarship (JDS) atu apoia dezenvolvimentu rekursu umanu iha 2019 mak oferese bolsu estudu ba funsionáriu públiku permanente hamutuk na’in ualu  hodi  hasai mestradu  iha universidade haat iha Japaun mak Doshisha, Universidade Internasionál Japaun, Universidade Ázia Pasífika Ritsumeikan no Universidade Nagoya durante tinan rua.

“JDS nia objetu prinsipál maka atu promove rekursu umanu liuhosi projetu ida nu’udar parte ida atu hametin amizade entre Governu Timor-Leste ho universidade sira iha Japaun”, Assistant Senior Country Officer ba JDS iha Timor-Leste, Belina Sanches Viana, durante konsultasaun ho instituisaun Estadu sira kona-ba programa ne’e iha otél Timor, tersa, (26/3).

Área importante, nia dehan universidade sira oferese mak administrasaun públika, hadi’a administrasaun no abilidade institusionál ho komponente rua; hadi’a administrasaun públika ho ninia sistema legál no hadi’a servisu iha área edukasaun no saúde.

Belina realsa área rua seluk tan maka dezenvolvimentu indústria rurál ho ninia komponente ida ne’ebé foku liu ba turizmu no ikus maka hadi’a transportasaun no dezenvolvimentu rurál.

Konsultasaun ne’e marka mós reprezentante hosi universidade Japaun.

Iha biban hanesan  Diretór Jerál Institutu Nasionál ba Administrasaun Públika (INAP) Agostinho Letencio de Deus, hatutan akordu ne’e asina ona hosi Ministru Negósiu Estranjeiru no Kooperasaun Timor-Leste ho Japaun iha 2018 hodi nomeia INAP no Komisaun Funsaun Públika (KFP) nu’udar implementadór ba programa.

“Programa ne’e durante tinan lima no kada tinan ita sei rekruta ema na’in ualu”, afirma nia durante konsultasaun.

Nune’e mós Prezidente KFP, Faustino Cardoso, hatete  Governu Japaun sai parseiru importante ba dezenvolvimentu. “Mai ita hotu aproveita didi’ak oportunidade ne’e”, katak.

Entretantu tuir dadus ne’ebé TATOLI asesu hatete prosesu rekrutamentu hodi  simu dokumentu halo ona iha  dezembru 2018 ho totál ema ne’ebé konkorre 42 maibé iha faze selesaun dokumentu iha janeiru 2019  no iha fevereiru liuba hili de’it kandidatu 20 ne’ebé sei tuir prova orál no saúde iha kuarta, (27/3) aban hosi reprezentante universidade Japaun.

Kandidatu 14 maka sei liu faze prova orál no saúde hodi hakat liu ba faze prova finál iha inísiu abril ne’ebé sei halo hosi membru komité kompostu hosi Governu Timor-Leste no Japaun hodi hili bolseiru na’in ualu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here