DILI,(TATOLI)—Organizasaun sosiedade sivíl Timor-Leste ne’ebé halibur-aan iha Aliansa Nasionál ba Tribunál Internasionál (ANTI), ohin, komemora loron internasionál direitu ba lia-loos, ne’ebé kada tinan, komemora iha loron 24 Marsu.

Loron ne’e dignifika Monseñór Óscar Arnulfo Romere husi Salvador ne’ebé asasinatu iha igreja laran bainhira dirije hela misa, husi rejime totalitarian El Salvador iha 24 Marsu 1980.

Hafoin tinan 30, Asembleia Jerál ONU (Organizasaun Nasaun Unida) dignifika Monseñór Romero nia sakrifísiu hodi defende ema lian laek sira ne’ebé buka lia-loos to’o sakrifika sira-nia vida umanu nian.

ONU no komunidade internasionál mós kondena maka’as aktu asasinatu hasoru Monseñór Romere nu’udar aktu violasaun direitu umanu no krime kontra umanidade.

ANTI liuhusi komunikadu imprensa ba Ajénsia TATOLI katak, iha kontextu Timór, durante okupasaun militár Indonézia, iha mós amu lulik, madre no bruder sira asasina husi militár Indonézia, Polísia Repúblika Indonézia (POLRI-sigla Indonézia) no milisia pro-Jakarta sira iha tempu ne’ebá.

“Timoroan sei lembra asasinadu boot sira ne’ebé akontese iha Igreja Liquiça, iha loon 5-6 Abril 1999, Igreja Suai, Setembru Negro iha loron 6 Setembru 1999 ne’ebé mós rezulta amu lulik na’in tolu (Padre Tarcisius Dewanto, Padre Hilario no Padre Francisco) hamutuk ho sarani atus resin mak asasinadu no dezaparesidu (lakon). Iha mós madre no bruder sira ne’ebé hasoru asasinasaun husi Tim Alfa Lospalos iha 25 Setembru 1999 iha Apikuru-Lautem”,  hakerek komunikadu ANTI nian ne’e .

ANTI konsidera mós katak asasíniu ne’e planeadu no sistematikamente husi autór prinsipál Jakarta ho nia aliadu sira. Husi masakre sira ne’ebé hahú dezde 1975 to’o 1999 rezulta maizumenus ema na’in 250.000 no lakon forsadu husi família sira la hatene sira-nia paradeiru.

Tuir ANTI, piór liu mak autór prinsipál sira ne’ebé komete direta iha masakre sira iha Timór hanesan Masakre 10 Juñu 1988 (Masakre Marabia-Dili) no Agostu 1983-Masakre Krarás Viqueque, koñesidu ho “Desa Janda”, ne’ebé rezulta ema liu 200 mak mate no dezaparesidu.

Tuir ANTI katak masakre sira ne’e lidera no hetan orientasaun komandu husi Prabowo Subianto, ne’ebé iha momentu ne’ebá nu’udar komandante KOPASUS (Komandu Pasukan Khusus). Ohin loron, Prabowo kandidata aan ba eleisaun prezidente Indonézia nian ba périodu 2019-2024.

“ANTI kestiona, oinsá ema ne’ebé liman ran sai lider ba nia povu ne’ebé sira oho! Kultura impunidade sei eziste no prevalese!,” refere tan komunikadu ANTI nian.

ANTI husu ba membru Konsellu Seguransa ONU (Organizasaun Nasaun Unida) no komunidade internasionál loke espasu foun ba Prabowo cs liuhusi jurisdisaun universál nune’e bele julga autór sira komete krime kontra umanidade iha Timor-Leste durante invazaun Indonézia nin.

 Iha Setembru 2013, ANTI liuhusi komunikadu imprensa hato’o ejijénsia katak:

  1. Ezije ba Governu rua (Timor-Leste no Indonézia) atu ho seriedade hodi hahú estabelese komisaun ba ema lakon ida hodi trata asuntu ema lakon forsadamente durante okupasaun ilegál Indonézia nia nune’e bele re-integra fali ema sira ne’ebé militár Indonézia halakon forsadamente ba família.
  2. Ezije ba Nasaun Unida atu hahú tau ajenda no diskute relatóriu Komisaun Inkéritu Nasaun Unida nia no KKP-HAM Indonézia nia espesialmente rekomendasaun Tribunál internasionál ba kazu krime grave iha Timor-Leste tanba laiha mekanizmu doméstiku ida inklui iha Timor-Leste no iha Indonézia mak fornese justisa ba povu Timor-Leste.
  3. Ezije ba komunidade Internasionál liuliu nasaun (Estadu Unidus Amérika, Inglaterra, Fransa, Australia no sira seluk) sira ne’ebé involve direita no indireta ba okupasaun ba rejime kruél Suharto iha Timor-Leste atu husu deskulpa formalmente ba povu Timor-Leste no hadi’ak povu ne’e nia moris.
  4. Husu ba estadu Timor-Leste atu asina no retifika konvensaun Internasionál kona-ba protesaun ba ema hotu husi halakon forsadamente nune’e bele hahú prosesa kazu ema lakon forsada no labele repete fali asuntu ne’e iha futuru Timor-Leste nudár estadu direitu demokrátiku.
  5. Inklui, Husu ba Governu Indonézia atu respeita prinsípiu direitus umanus atu la-bele taka dalan ba justisa ba kazu krime grave liuliu prosesa ema lakon forsadamente iha Timor-Leste nune’e hahú hametin relasaun bilateral entre estadu Timor-Leste no Indonézia ba oin ne’ebé di’ak liu.
  6. Husu ba Povu Timor-Leste tomak nia apoiu hodi bele prienxe formuláriu kona-ba ema lakon ne’ebé Asosiasaun Vítima prepara no agora daudaun sirkula hela nune’e bele ajuda buka ema sira ne’ebé durante lakon iha periodu okupasaun.
  7. Husu ba PDHJ (Prokuradoria Direitu Umanu no Justisa) no Komnas-HAM Indonézia atu servisu sériu ba akordu ne’ebé organizasaun rua ne’e estabelese liuliu kona-ba ba ema lakon nune’e bele buka tuir ema sira ne’ebé lakon durante okupasaun militár Indonézia nian.

ANTI kompostu husi   Asosiasaun HAK,  Judicial System Monitoring Program (JSMP), Asosiasaun Vítima, Asosiasaun Chega ba Ita, Front Mahasiswa Timor Leste,  Sekretariadu Timor-Leste NGO Forum (FONGTIL),  Institutu Timor-Leste ba Monitór no Analiza Dezenvolvimentu (La’o Hamutuk), Fokupers,  Ita Ba Paz, CDI (Comunity Development Institute), KSI (Kdalak Sulimutu Institut), KBH (Knua Buka Hatene), FTM  (Forum Tau Matan) no OPVG (Organizasaun Populár Vítima da Guerra).

Jornalista: Rafy Belo

Editór: Francisco Simões

 

HAKEREK NO HATÁN

Please enter your comment!
Please enter your name here