Uma Fukun Parlamentu Nasionál. Imajen/Espesiál

DILI,(TATOLI) – Povu Timor-Leste liuhusi nia reprezentante iha Parlamentu Nasionál (PN) iha plenária, ohin, fó votu solidariedade ba vítima Siklone Idai iha Moçambique no mós vítima inundasaun iha Provínsia Papua, Indonézia.

Siklone Idai ne’ebé akontese iha loron 15 Marsu, tinan ne’e, lori sofrimentu boot ba ema ua’in iha Moçambique ne’ebé afeta to’o Zimbábue, Malawi no mós destruisaun iha fatin barak.  Tuir dadus provizóriu ikus iha vítima 446 mak mate iha Moçambique, no ema barak mak kanek no dezlokadu.

Iha loron 16 Marsu, foin lalais ne’e, akontese inundasaun boot iha Provínsia Papua-Indonézia ne’ebé lori mós sofrimentu ba populasaun sira lubun, inklui halo at infraestrutura báziku sira no komunidade nia uma barak mak at.

“Ba nasaun ho povu sira  ne’ebé afetadu iha dezastre natureza ne’e, presiza hetan apoiu urjente no imediatu husi komunidade internasionál”,  afirma  Sekretária Meza PN, Maria Terezinha Viegas.

Parlamentu Nasionál rekomenda ba Governu Timor-Leste buka mekanizmu disponivel hodi bele fó apoiu no espresa profundu pezar ba vítima husi dezastre ne’e no manifesta solidariedade ba família vítima no autoridade Moçambique.

Aprovasaun ba votu solidariedade ne’e  ne’e ho votasaun a favór 52, kontra 0 no abstensaun 0. Biban ne’e, PN mós fó votu pezar no solidariedade ba vítima inundasaun iha Indonézia ho votu  a favór 53 kontra 0 no abstensaun 0.

Dadus ikus husi autoridade Indonézia nian fó sai katak, iha ema na’in 70 mak kanek no  4.150 mak dezlokadu no ema na’in 89 mak sei lakon. Autoridade sira kontinua  halo esforsu buka tuir vítima sira ne’ebé mak lakon.

“Parlamentu Nasional espresa profundu pezar ba vítima dezastre ne’e no manifesta solidariedade ba família, povu no autoridade Indonézia”, refere deklarasaun PN.

 Jornalista: Julia Chatarina

Editór: Francisco Simões

 

 

 

HAKEREK NO HATÁN

Please enter your comment!
Please enter your name here