Reprezentante permanente ba Nasaun Unida, Embaixadora Maria Helena Lopes de Jesus Pires hamutuk ho Maria Chatardová. Foto: MNEK

DILI, (TATOLI) – Timor-Leste hamutuk ho Repúblika Checa ko-fasilitadora prosesu aliñamentu servisu Asembleia Jerál Organizasaun Nasaun Unida (ONU), ECOSOC (Konsellu Sosiál no Ekonómiku-sigla inglés) ho orgaun subsidiária sira ba implementasaun ajenda 2030.

Timor-Leste liuhusi nia reprezentante permanente ba Nasaun Unida, Embaixadora Maria Helena Lopes de Jesus Pires, hamutuk ho Maria Chatardová, ofisiálmente hahú ko-ofisializa prosesu informál dahuluk kona-ba aliñamentu servisu Asembleia Jerál Nasaun Unida, ECOSOC ho orgaun subsidiária sira ba implementasaun ajenda 2030 iha loron 18 marsu 2019.

Tuir komunikadu Ministériu Negósiu Estranjeiru no Kooperasaun (MNEK) ba TATOLI katak prosesu konsulta informál dahuluk ho estadu membru sira ne’e, partisipa mós husi Prezidente Asembleia Jerál Nasaun Unida, Maria Fernanda Espinosa Garcés.

Prosesu refere hala’o bazeia ba mandatu ne’ebé mai husi rezolusaun Asembleia Jerál númeru 72/313, setembru 2018, ho títulu Revitalizasaun Servisu Asembleia Jerál nian, partikularmente parágrafu 29, 30 no 31, kona-ba nesesidade atu hasa’e sinerjia no hamenus koerénsia, hamenus sobrepozisaun ne’ebé hetan iha Ajenda Asembleia Jerál, ECOSOC no orgaun subsidiária sira nomós fórum polítiku nível aas no fórum relevante sira seluk ba implementasaun Agenda 2030, ba Dezenvolvimentu Sustentável.

Prosesu konsulta informál dahuluk ne’e hetan partisipasaun husi Estadu Membru lubun bo’ot husi Asembleia Jerál Nasaun Unida.

Durante konsulta informál ne’e,  grupu hanesan G77 no Xina, Uniaun Europeia, hato’o sira-nia deklarasaun hanesan grupu no Estadu Membru balun hanesan Brazil, Cabo Verde, El Salvador, Japaun, Kuba, Mexico, hato’o sira-nia deklarasaun tuir kapasidade nasionál.

Tuir planu, konsulta informál ba tinan ida ne’e sei hala’o dala haat, hahú iha fulan marsu, abril, maiu no juñu.

Ko-fasilitadora na’in rua, Embaixadora Pires no Embaixadora Chatardová, hetan nomeasaun husi Prezidente Asembleia Jerál, iha fulan novembru 2018, hodi ko-fasilita prosesu refere.

Prosesu aliñamentu ne’e rasik hahú ba dahuluk iha tinan 2016, iha sesaun 70 Asembleia Jerál, bainhira Prezidente Asembleia Jerál nomeia Reprezentante Kolombia nu’udar Ko-Fasilitadora ba prosesu refere ho apoiu husi Maroco, Olanda no Slovenia.

Sesaun daruak hala’o iha tinan 2017, durante sesaun 71 Asembleia Jerál ho Ko-fasilitasaun husi Austrália no Argentina. Iha tinan 2018, prosesu refere kontinua ba datoluk durante sesaun 72, ho Ko-fasilitasaun husi São Vicente no Granadinas no Bélgica.

Molok ne’e, iha fulan fevereiru, tinan ida ne’e, Timor-Leste asume mós Prezidénsia ba Grupu Ázia Pasífiku, durante fulan ida nian laran, hafoin simu husi Tailándia nu’udar Prezidente grupu nian ba fulan janeiru.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here