Diretór Jerál Estatistika Ministériu Finansas, Elias dos Santos Ferreira. Imajen/MF.

DILI, (TATOLI)–Diresaun Jerál Estatístika (DJE) husi Ministériu Finansa (MF), iha semana oin,  sei lansa relatóriu importante tolu, kompostu husi relatóriu  konta nasionál, peskiza emprezariál ho dadus komérsiu.

Diretór Jerál Estatístika, Elias dos Santos Ferreira, ohin, iha serimónia lansamentu Mapa Pobreza Sensivel ba Jéneru iha Ministériu Finansa, Dili, esplika katak, relatóriu sobre kontas nasionál ne’e atu bele hatene GDP (gross domestic product) 2017 nian.

“Ami mós halo peskiza emprezariál 2017 no mós dadus komérsiu 2017. Iha dadus komérsiu ne’e, anuálmente, ita bele hatete esportasaun ne’e saida, importasaun ne’e mai husi ne’ebé, país ne’ebé maka ita esporta bá no país ne’ebé maka importa mai”, esplika  Elias dos Santos Ferreira.

Kona-ba relatóriu peskiza emprezariál, Elias Ferreira hatutan tan, atu fasilita bele hatene kompañia iha Timór ne’e simu timoroan ba serbisu feto no mane na’in hira no sobre dadus komérsiu nian bele haree volume esportasaun no importasaun oinsá.

Nia hatutan, iha relatóriu rua ne’ebé sei pendente maka peskiza infantíl ne’ebé serbisu hamutuk ho Sekretáriu Estadu Formasaun Profisionál no Empregu (SEFOPE) ho Internasionál Labour Organization (ILO) no mós ho UNICEF kona-ba konjugasaun dadus sira ne’ebé maka iha.

“Ita bele hatene pobreza ne’e grupu idade ne’ebé maka afeta. Afeta ne’e iha área rurál ka urbana”,  tenik Elias hodi aprofunda mós katak, DJE mós koopera ho Ministériu Agrikultura no Peska (MAP), atu halo Sensu Agrikultura dahuluk iha Timor-Leste.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here