Prezidente Parlamentu Nasionál, Arão Noé de Jesus da Costa Amaral. Imajen Egas Cristovão

DILI, (TATOLI) – Prezidente Parlamentu Nasionál, Arão Noé de Jesus da Costa Amaral, hatete Parlamentu Nasionál (PN) sei apoiu Governu hodi reforma lei ba prosesu implementasaun  ajénsia ajuda esterna hosi Estadu Naklibur Amérika (EUA) ho naran Millennium Challenge Corporation (MCC) ho misaun atu redús ki’ak.

“Parlamentu deklara apoia totalmente ba programa ne’e, hodi konkretiza programa ida hodi lori susesu ba ita nia povu no ita nia rai”, afirma Prezidente PN ba jornalista sira iha salaun Komisaun Nasionál Eleisaun (CNE-sigla portugés), segunda, (25/3).

Apoiu ne’e nia afirma tanba liga ho interese nasionál ba redusaun ki’ak  hodi hadi’a kondisaun sosiál no ekonomia povu.

Tuir reprezentante povu ne’e apoiu PN nian; reforma lejizlativa hodi ajuda iha ninia implementasaun.

“Governu maka sei deteta lejizlasaun sira la favoravel para konkretiza programa ne’e, tanba ne’e parlamentu prontu atu halo alterasaun no aprovasaun ba lejizlasaun sira ne’e”, tenik tan.

Arão Noe katak antes ne’e ekipa MCC hosi EUA halo ona audiénsia ho Prezidente PN hodi informa kona-ba misaun MCC ho ninia programa no benefísiu sira ba Timor-Leste.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here