Membru Parlamentu Nasionál Hosi Bankada KHUNTO, António Verdiál.

DILI, (TATOLI) – Deputadu Bankada Governu hosi partidu Kmanek Haburas Unidade Nasionál Timor Oan (KHUNTO), António Verdial, proukupa tebes ho seguransa ne’ebé la’o dadauk iha rai laran, espesífikamente iha Díli laran, tanba ne’e nia husu autoridade seguransa bele masimiza patrulhamentu.

“Husu autoridade seguransa halo patrulhamentu ne’ebé efetivu, nune’e povu ne’e bele moris ho hakmatek no sente sira iha seguru nia laran”, tenik iha plenária segunda ne’e.

Nia haktuir ohin dader akompaña katak ema deskoñesidu oho sidadaun xines ida iha Hudi Laran, Bairru Pité. “Karik iha krime organizadu ruma”.

Hodi hatutan: “Husu autoridade seguransa hanesan Polísia Nasionál Timor-Leste (PNTL), espesífikamente ba polísia komunitária atu servisu iha kooperaaun, koordenasaun no kolaborasaun di’ak ho autoridade lokál sira, nune’e bele hamutuk hodi garante estabilidade ba ema husi rai liur no ita povu Timor-Leste bele moris iha seguransa nia laran”.

Hatan ba kestaun ne’e, Sekretáriu Estadu Komunikasaun Sosiál, Merício Juvenal dos Reis Akara, hateten en jerál seguransa iha rai-laran di’ak hela, maibé iha kazu balun mak foin akontesse sei transmite ba Ministru Defeza no Seguransa, Filomeno Paixão, atu tau atensaun hamutuk ho PNTL.

“Téknika Ministru Defeza no Seguransa mak sei tau atensaun ba assuntu ne’e”, dehan.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here