Prezidente Repúblika, Francisco Guterres Lú Olo, akompaña hosi Prezidente Autoridade Rejiaun Administrativa Espesiál Oekusi Ambenu (RAEOA), Marí Alkatiri, loke Expo 2019 ho lema “Deskobre forsa hosi ita-nia produtu lokál sira”. Imajen hosi fanpage ZEESM

OEKUSI, (TATOLI) – Autoridade Rejiaun Administrativa Espesiál Oekusi Ambenu (RAEOA) realiza Expo 2019 ho lema “Deskobre forsa hosi ita-nia produtu lokál sira”.

Atividade ne’e hala’o iha salaun Parókia Nossa Senhora do Rosario, Bairru Numbei, Aldeia Sanane, Suku Costa, Sub rejiaun Pante Makassar, RAEOA, 25-29 marsu 2019.

Objetivu hosi expo ne’e atu promove produtu lokál no artezenál ne’ebé komunidade RAEOA iha hanesan hudi, avakate, sabraka, forerai, batar, fós no produtu artezenatu hanesan tais, vaju, hena meza no sel-seluk tan. Produtu hirak ne’e ho folin hahú hosi $1.00 to’o $20.00.

Prezidente RAEOA, Marí Alkatiri, hateten objetivu hosi ekonomia sosiál maka hakbiit povu kbiit laek nia kualidade vida.

“Sé ita haree ba expo ne’e nu’udar expo ne’ebé ki’ik maibé bainhira ita ko’alia ekonomia sosiál ita tenke fó prioridade atu hakbiit povu kbiit laek nia kualidade vida”, nia esplika.

Marí haktuir orientasaun hahú kedas iha tinan 2016-2017 atu investe barak liu ba treinu povu kbiit laek atu bele hadi’a produsaun rasik, aumenta produtividade ba produsaun atu kompete iha merkadu.

Entretantu, Prezidente Repúblika, Francisco Guterres Lú Olo, hateten produsaun no produtividade ne’e importante teb-tebes.

“Ita Timor la moris iha fatuk leten. Oekusi nia natar ne’e iha sidade nia klaran ne’ebé halo furak liu sidade. Ninia to’os mós iha. Ninia modelu produsaun seluk ne’e iha. Bainhira Zona Espesiál Ekonomia Sosiál Merkadu (ZEESM) mai kria tan kondisaun entaun bele halo produsaun no aumenta tan produtividade. Signifika katak ita-boot sira nia merkadu hahú nakloke no folin dadauk”, Lú Olo informa.

Tuir nia biar expo ne’e bele ki’ik maibé ne’e pasu importante ida atu hakat ba oin to’o hetan susesu no susesu ida ne’e sei transmite ba munisípiu sira seluk iha Timor laran.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here