Prezidente Autoridade RAEOA, Marí Alkatiri, kaer liman ho Prezidente Repúblika, Francisco Guterres Lú Olo, hafoin lansamentu eliminasaun programa TBC iha Oekusi, segunda, (25/3/2019). Imajen Xisto Freitas

OEKUSI, (TATOLI) – Autoridade Rejiaun Administrativa Espesiál Oekusi-Ambenu (RAEOA) lansa programa ho tema “Planu Rejionál ba Eliminasaun Moras Tuberkoluze iha RAEOA”.

Programa ne’e loke direta hosi Prezidente Repúblika, Francisco Guterres Lú Olo, iha salaun Alfándega Palaban, Sub-rejiaun Pante Makassar, RAEOA, segunda, (25/3).

Objetivu hosi lansamentu, Prezidente Autoridade RAEOA, Marí Alkatiri, hateten atu kombate moras tuberkoluze (TBC-sigla ingleza) ne’ebé oho ema barak ona iha mundu inklui Timor-Leste.

“Ne’e signifika bainhira iha kiak TBC sempre iha nafatin. Tanba ne’e, programa ida ne’ebé maka atu hahú iha ne’e nu’udar programa ida ne’ebé maka integradu ka kombate transversál ba TBC”, Marí esplika.

Nia dehan parte atu kura TBC ne’e tenke liga ba saúde públika, se lae, nunka kombate moras refere.

“Iha ita nia rain, liu-liu iha Oekusi TBC sai moras ida ne’ebé bolu moras indémiku ida. Ne’e duni ita atu hahú hosi Oekusi, depois loke dalan ba Timor-Leste tomak”, akresenta.

Iha fatin hanesan, Vise Ministru Saúde, Bonefácio Reis, haklaken kombate TBC ne’e transversál, tan ne’e presiza involvementu ema hotu-hotu nian.

“Ita hatene katak TBC hamate ema barak no iha Timor-Leste númeru TBC aas tebes kompara ho nasaun sira seluk iha sudeste aziátiku”, afirma.

Governante ne’e hatutan: “Númeru ema 498 hosi ema na’in 100,000 sofre moras TBC kada tinan no mate hamutuk ema na’in 100 hosi ema na’in 100,000 iha kada tinan, tanba ne’e tempu ona ita hotu tenke halo asaun para bele hapara TBC”.

Nia apela ba populasaun atu hakbesik ba fasilidade saúde para hetan informasaun no detesaun sedu.

Pur-ezemplu, nia dehan abitante ne’ebé me’ar semana rua nia laran la para tenke hakbesik fasilidade saúde para kolekta me’ar tasak.

Entretantu, Sekretáriu Rejionál asuntu Saúde RAEOA, Marcos Céo, katak moras TBC ne’ebé rejista ona iha RAEOA dezde 2018 hamutuk 252.

Hosi númeru ne’e, nia dehan ema na’in 167 maka la konsege salva moris. Kauza hosi moras TBC, nia haktuir maka fuma, saneamentu ladi’ak no ai-han la sufisiente atu bele asegura imunidade isin.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here