Governu Timor-Leste ho Amérika liuhosi ninia embaixadora iha TL, Kathleen M. Fitzpatrick, lansa Compact Develvopment Team hodi apoiu prosesu implementasaun programa Millennium Challenge Corporation (MCC). Lansamentu ne’e hala’o iha salaun Lalini Lariguto CNE, Kaikoli, Segunda, (25/3/2019). Imajen Egas Cristovão

DILI, (TATOLI) – Governu Timor-Leste ho Estadu Naklibur Amérika (EUA-sigla inglés) liuhosi ninia ajénsia Millenium Challenge Coorperation (MCC), ohin lansa ekipa kompaktu ba dezenvolvimentu ka  Compact Development Team Timor-Leste (CDT TL) ho misaun atu redús kiak iha Timor-Leste.

“Ami nia objetivu, hamutuk ho Timor-Leste hasae ekonomia, hamenus ki’ak. Objetivu klaru, objetivu importante ba amizade entre Timor-Leste ho Estadu Unidu Amérika (EUA), ita nia povu no ema timoroan no ema Estadu Unidu”, dehan embaixadora EUA iha TL, Kathleen M. Fitzpatrick, liuhosi konferénsia imprensa hafoin lansamentu iha salaun Komisaun Nasionál ba Eleisaun (CNE-sigla portugés)  Kaikoli ho tema Hasa’e Kbiit Ekonomia, Hamenus Ki’ak, segunda, (25/3).

Nia dehan liután Governu EUA liuhosi ninia embaixada iha TL orgullu, tanba ekipa ne’e lidera husi Eis  Ministru, Constâncio Pinto. Ekipa ne’e sei aselera servisu ba implementasaun.

“Agora ami nia ekipa USA MCC ko’alia ho ministru Fidelis no diretór ezekutivu, diretór nasionál sira kona-ba projetu sira. Ami iha prosesu ko’alia hodi deside projetu”, tenik tan.

Projetu ne’e sei implementa durante tinan ne’e, tanba ne’e EUA sei deklara montante osan hira maka sei apoiu TL ba iha tinan oin.

Iha momentu hanesan, Diretór Ezekutivu Nasionál ba CDT TL, Constâncio Pinto, hatete misaun hosi ekipa CDT mak prepara no dezeña programa, tanba akordu ida nasaun rua sei asina hodi implementa.

“Neste-momentu CDT sei halo koordenasaun besik liu ho ministériu hotu-hotu, sosiedade sivíl, setór privadu hodi identifika programa saida maka ita dezeña hodi hatama ba iha programa kompaktu ne’e”, dehan Diretór Ezekutivu.

Ekipa kompaktu ne’e kompostu hosi tékniku na’in ida no espesialista na’in haat mesak timoroan ne’ebé iha espesialidade  iha área finansa, relasaun públika, jéneru no inkluzaun no mós setór privadu.

Iha 2019, nia dehan sei aprezenta programa MCC hodi dezeña, nune’e hahú implementa iha 2021.

Oportunidade ne’e, Ministru Reforma Lejizlativa no Asuntu Parlamentár, Fidelis Manuel Leite Magalhães, hatete área jerál ba programa ne’e maka; redús kestaun labarik tinan boot maibé fizikamente badak no ki’ik, tanba ligasaun ho nutrisaun.

Governante ne’e dehan programa prioridade seluk mak bee moos ho saniamentu no mós promosaun ai-han hodi hasae nutrisaun.

Tuir mai treinamentu profesionál ba joven sira hodi aumenta kapasidade no koñesimentu. Programa ikus maka hadi’a di’ak liután klima negósiu, liuliu kria kuadru legál sira hodi dada investimentu ba kriasaun kampu servisu ba timoroan.

Lansamentu ne’e partisipa hosi Ministru Reforma Lejizlativa no Asuntu Parlamentár, Fidelis Manuel Leite Magalhães, Ministru Obra Públika, Salvador Eugénio Soares dos Reis Pires.

Ministra Edukasaun Juventude no Desportu, Dulce Jesus Soares, Vise Ministra Solidariedade Sosiál no Inkluzaun, Signi Chandrawati Verdial no hetan  akompaña hosi Prezidente Parlamentu Nasionál, Arão Noé de Jesus da Costa Amaral.

Jornalista: Agapito dos Santos

Editora: Rita Almeida

MCC Sei Oferese Rihun 750 Ba TL Reduz Kiak

HAKEREK NO HATÁN

Please enter your comment!
Please enter your name here