Portavóz PNTL, Superintendente Xefe Arnaldo de Araújo. Imajen/dok.Tatoli

OE-CUSSE, (TATOLI)—Iha inísiu tinan 2019, husi fulan Janeiru to’o Fevereiru, kazu ne’ebé rejista aas iha Polisia Rejiaun Administrativa Espesiál  Oe-Cusse Ambenu (RAEOA) mak kazu violénsia doméstika, abandona família no integridade fízika simples.

Komandante Polisia  RAEOA, Superintendente Arnaldo Araújo, informa katak, iha fulan Janeiru, tinan ne’e, Polisia rejistu kazu 22 no iha fali fulan Fevereiru iha kazu 19. Mas iha fali, fulan Marsu ne’e seidauk iha kazu ruma mak rejista.

“Kazu sira ne’e kuandu keixa mai polísia no polísia foti sira nia deklarasaun depois enkamiña ba Ministériu Públiku hodi prosesu tuir lei mak vigor”, hateten  Superintendente Arnaldo Araújo ,ba jornalista sira, Sábadu (23/3/2019),   iha Sub-rejiaun Pante Makassar, RAEOA.

Superintendente Arnaldo Araújo fiar katak Ministériu Públiku (MP)sei hola medida hodi  prosesa kazu sira ne’e ba to’o iha Tribunal. Nia hatutan mós katak,  iha fulan hirak liu-ba sira loke prosesu ba kazu hatama karreta ilegál no kombustivel ne’ebé Unidade Patrullamentu Fronteira (UPF) sita iha fronteira .

“Sasán ne’ebé UPF sita, ami aprezenta ona ba iha Ministériu Públiku. Ita hatene katak ita-nia komunidade sei moris ho buat ilegál sira ne’e tanba nesesidade maka obriga. Maibé, ami kontinua fó hanoin ba sira liuhusi Polisiamentu Komunitária para evita importasaun sasán liuhusi dalan ilegál”, hateten Superintendente Arnaldo Araújo.

Nia lia tun mós katak,  mezmu iha difikuldade ho dezafiu oioin, tanba Oe-Cusse iha Indonézia nia klaran, maibé ida ne’e la sai hanesan kestaun ne’ebé boot atu impede polisia nia kna’ar.

“Ami prontu atu asegura rejiaun ida ne’e hodi kombate asaun ilegál sira”, afirma  Komandante Polísia Nasionál Timor-Leste (PNTL) RAEOA, Superintendente Arnaldo Araújo.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here