Komandante Polísia RAEOA, Superintendente Arnaldo Araújo. Imajen/Xisto Freitas

OE-CUSSE, (TATOLI)–Komandante Polísia Autoridade Rejiaun Administrativa Espesiál Oe-Cusse Ambeno (RAEOA), Superintendente Arnaldo Araújo, rekoñese katak, Oe-Cusse mós iha  eis membru arte marsiál ne’ebé governu deside taka tiha ona, maibé entre sira  sempre fó liman ba malu hodi evita konflitu hanesan akontese iha munisípiu seluk iha territóriu Timor-Leste, foin lalais ne’e.

“Ha’u bele dehan katak kooperasaun no kolaborasaun entre eis membru arte marsiál hanesan Persaudaraan Setia Hati Terate (PSHT), Ikatan Kera Sakti (IKS) ho Klibur Oan Raiklaran (KORK) la’o di’ak tebes. Sira rasik tuur hamutuk hodi kolahora malu,  kria  no asegura mós estabilidade iha RAEOA”, hateten  Superintendente Polisia Arnaldo  Araújo ba jornalista sira, ohin, iha nia kna’ar fatin, Sub-rejiaun Pante Makassar, Oe-Cusse.

Tuir nia haree katak eis membru arte marsiál hirak ne’e iha konsiénsia no kumpre lei ne’ebé governu fó sai kona-ba taka arte marsiál. Nune’e, kona-ba situasaun jerál iha RAEOA, la’o di’ak no hakmatek.

“Hahú hosi liña fronteira Sakato, Citrana, Pássabe no Oesilo durante ida ne’e la’o hakmatek. Laiha buat ida maka akontese hanesan ita hotu la espera”,  Arnaldo tenik.

Nia haktuir, situasaun hakmatek tanba iha ona Ofisiál Polísia Suku (OPS) ne’ebé maka kolokadu iha suku 18 iha Oe-Cusse hamutuk ho xefe suku no komunidade hala’o kna’ar asegura estabilidade.

“Oe-Cusse iha faze konstrusaun, tan ne’e komunidade iha konsiénsia boot asegura estabilidade hodi fó biban ba dezenvolvimentu la’o iha Oe-Cusse”, Arnaldo hateten.

Nia apela ba komunidade Oe-Cusse atu fó liman ba malu nafatin, nune’e bele kria estabilidade ne’ebé di’ak tanba Oe-Cusse oras ne’e iha faze dezenvolvimentu.

“Ita hotu haree katak iha sidade Oe-Cusse ne’e nabilan tebes no sidade ida ne’ebé moos tebtebes, ne’e duni, husu ba komunidade atu hakiak estabilidade ijiene no estabilidade seguransa para labele fó vantajen ba terseira pesoa atu estraga estabilidade rejiaun”, tenik  Arnaldo.

Tuir observasaun Ajénsia TATOLI  nian iha kapitál RAEOA daudaun, komunidade foku ba ida-idak nia atividade hahú dadeer to’o loraik. Iha tempu kalan, komunidade balun paseiu iha tasi ibun hodi simu anin fresku husi tasi no balun la’o hadulas sidade RAEOA hodi haree sidade nia furak.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here