Embaixadór Timor-Leste ba Indonésia, Alberto X.P. Carlos. Imajen/Francisco Simões

JAKARTA, (TATOLI)—Haree ba estudante timoroan barak mak estuda iha varia eskola no  varia sidade iha Indonézia, maka importante tebes atu iha ema ne’ebé koloka iha Embaixada Timor-Leste nian ba Indonézia hodi bele tau matan no  responde ba problema ho dezafiu hotu ne’ebé estudante timoroan sira enfrenta.

Durante ne’e, governu liu husi Ministériu Edukasaun nomeia ema ida nudár  Adidu ba Edukasaun iha Embaixada Timor-Leste nian iha Jakarta ho nia asistente na’in rua (2) ne’ebé na’in ida kobre serbisu interese edukasaun nian iha Bali no ida seluk iha Kupaun. Maibé, dezde  inísiu fulan Maiu tinan 2018 to’o ohin loron, funsionamentu eskritóriu adidu edukasaun nian ho nia asistente na’in  rua nian la la’o ona tanba sira nia mandatu remata no fila hotu ona mai Timor-Leste.

Husi sorin seluk, Timor-Leste ho Indonézia nia asuntu komérsiu barak tebes atu trata, maibé adidu komérsiu mós nia mandatu hotu ona no fila ona mai Timor-Leste. Nune’e, atividade serbisu adidu Edukasaun ho Komérsiu nian tula hela ba embaixada.

“Se sira hakarak taka sira nia eskritóriu taka de’it hodi hateten mai Ministériu Negósiu Estranjeiru no Kooperasaun (MNEK) para fó serbisu ne’e mai embaixada  hodi embaixada rekruta ema seluk atu halo serbisu ne’ebé tuir nesesidade reprezentasaun adidu edukasaun ho komérsiu nian”, hateten Embaixadór Timor-Leste ba Indonézia, Alberto X.P. Carlos, bainhira dada lia ho TATOLI  iha nia eskritóriu Embaixada Timor-Leste nian iha Jakarta,  iha Mayapada Tower, rua. Jenerál Sudirman, foin lalais ne’e.

Embaixadór  Alberto Carlos, hatutan, ho la iha prezensa Adidu Edukasaun ho Komérsiu nian ba Indonézia lori dezafiu boot ba embaixada Timor-Leste nian iha Indonézia, liuliu relasiona ho orsamentu hodi sustenta funsionamentu eskritóriu adidu sira nian no oinsá mak atu atende nesesidade no dezafiu ne’ebé timoroan lubun ua’in hala’o sira nia estudu iha Indonézia.

Tuir númeru ne’ebé rejista iha Embaixada Timor-Leste ba Indonézia iha Jakarta katak, provolta estudante timoroan na’in 4.000 to’o na’in 5.000 mak hala’o sira nia estudu  iha vária eskola iha Indonézia, kompostu husi Eskola Bázika (SD-sigla Indonézia), Eskola Pre-Primaria (SLTP-siglaIndonézia), Eskola Primaria (SLTA-siglaIndonézia), ho mós Ensinu Superiór (universitáriu).  Husi númeru ne’e, maioria estudante ne’ebé kontinua sira nia estudu iha ensinu superiór.

Ho númeru estudante timoroan lubun ne’e hatudu katak, estudante timoroan barak liu mak hala’o sira nia estudu iha Indonézia, kompara ho rai seluk hanesan Malázia, Filipina, Koreia do Sull,  Singapura, Australia, Portugal, Brazil, Nova Zelándia no seluk-seluk tan.

“Ko’alia kona-ba estudante iha Indonézia, ha’u hakarak nakloke de’it katak, asuntu ida ne’e asuntu boot no komplikadu uitoan ne’ebé envolve ema barak no hasai enerjia barak ba futuru edukasaun ita nia oan no bei-oan sira nian”, hateten Embaixadór Timor-Leste ba Indonézia, Alberto Xavier Pereira Carlos.

Nia hateten, to’o daudaun ne’e embaixada tenta apoia nafatin estudante timoroan lubun ne’e  para sira la bele enfrenta problema, liu-liu hanesan sidadaun timoroan. Tanba iha aspetu nudár estudante, Ministériu Edukasaun maka responsabiliza atu trata estudante sira nia situasaun.

Ho auzénsia adidu edukasaun iha Indonézia, maka funsionamentu no operasionalidade eskritóriu adidu edukasaun nian, embaixada mak frekuente hela serbisu adidu nian hodi trata nesesidade estudante timoroan sira nian, hanesan sidadaun timoroan no hanesan mós estudante timoroan.

“Ha’u hein to’o Marsu no too fin de Marsu mak la iha, ha’u haruka taka eskritóriu adidu edukasaun nian iha Jakarta”, afirma Embaixadór   Alberto X.P. Carlos.

Atu bele hetan resposta prezensa adidu edukasaun nian ne’e, Embaixadór Alberto X.P. Carlos, haruka ona karta ofisial dala tolu (3) ba Ministériu Edukasaun, maibé to’o ohin loron la iha resposta pozitivu.

“Mezmu ha’u haruka karta dala tolu ona, mas to’o agora zero resposta no zero komunikasaun. Ha’u telefone ona ba Xefe Gabinete ME nian mas responde oi-oin de’it. Ida ne’e la’ós formal, ita haruka karta no hein responde ho karta atu ita iha baze ba foti medida no halo asaun. Se lae, susar uitoan”, afirma Embaixadór  Alberto Carlos.

Embaixadór konsidera Ministériu Edukasaun  ladún iha vontade di’ak atu serbisu hodi atende situasaun estudante sira ne’ebé Indonézia no buat balun ne’ebé Embaixadór la dun satisfás durante ne’e mak  dala ruma mós Adidu Edukasaun haree de’it mak estudante uitoan ne’ebé mak hetan bolsu estudu husi Estadu no restu nudár sidadaun timoroan sira la preokupa.

“Ne’e mós la bele tanba nia sidadaun timoroan mas probetura mai eskola iha Indonézia tenke-seer tau matan. Ita tenke mai iha esteriór serbisu ba sidadaun no estadu nia interese “, Embaixadór  Alberto Carlos afirma tan.

Tuir nia hanoin, atu serbisu ho di’ak liu tan ba trata asuntu estudante timoroan sira nian iha Indonézia, maka  koloka  adidu edukasaun iha Jakarta hodi kobre estudante sira ne’ebé eskola iha Java Oeste (Jawa Barat),  nia asistente ida iha Jogja hodi kobre estudante timoroan sira iha Sentrál Java (Jawa Tengah) no ida iha  Bali kobre Java Leste (Jawa Timur) ho asistente na’in ida iha Kupaun.

Embaixadór Alberto, triste uitoan tanba besik tinan ida ona Ministériu Edukasaun  la hala’o nia funsaun halo didi’ak tuir buat ne’ebé embaixada hakarak atu haruka adidu edukasaun mai koloka iha Jakarta para bele tau matan ba estudante timoroan sira nia situasaun no difikuldade estudu.

Ba daudaun ne’e, serbisu operasionais adidu edukasaun nian iha Jakarta, inklui nia asistente rua nian iha Bali ho Kupaun, embaixada mak akumula tanba adidu ho asisténsia adidu edukasaun la iha ona no la iha fali adidu foun para substitui  funsionamentu serbisu eskritóriu adidu nian.

Embaixadór Alberto esklarese katak, ho la iha adidu edukasaun nian ne’e, obriga embaixada hala’o jinástika boot ida para buka osan hodi taka kustu operasionais eskritóriu adidu sira nian no embaixada haruka ona karta dala tolu (3) atu husu ba Ministériu Edukasaun rezolve problema ne’e, mas to’o agora la responde no la rezolve.

“Ida ne’e mak ha’u sente knar ida ne’ebé tuir loos Ministériu Edukasaun  halo ho despeza Ministériu Edukasaun  nian, mas sira abandona tiha hodi soe hela responsabilidade ne’e mai Embaixada.”

“Ida ne’e halo ha’u mós la kontente. Tanba adidu la iha, ha’u mak tenke asume temporariamente  hanesan enkarregadu adidu edukasaun para tau matan hela ba estudante sira. Tanba orsamentu husi ME la iha maka ami obrigatóriu hasai tiha funsionáriu balun iha embaixada tanba orsamentu la iha para selu saláriu funsionáriu iha eskritóriu adidu edukasaun nian. Hasai kustu embaixada nian implika tab-tebes ba operasaun embaixada nian iha Jakarta. Ne’ebé ha’u foin mak haruka karta terseira nian ba ME atu husu karik bele taka  ou kontinua”, hatutan Embaixadór  Alberto X.P. Carlos.

Se taka, tuir embaixadór  ne’e katak,  entrega responsabilidade tomak ba embaixada  atu embaixada rekruta ema foun para halo espesialmente serbisu adidu edukasaun nian ho kustu embaixada nian.

“Se nonook de’it no la liga, ita hakerek karta mós nein responde  no la fó justifikasaun ida, ne’e hatún fali ita nia dignidade iha misaun estranjeiru”, hateten Embaixadór Timor-Leste ba Indonézia.

To’o notísia ne’e publika, seidauk hetan klarifikasaun husi parte relevante sira, liuliu Ministériu Edukasaun  ho Ministériu Turizmu, Komérsiu no Indústria.

EKIPA

HAKEREK NO HATÁN

Please enter your comment!
Please enter your name here