Mate-isin eis-Ministru IV Governu Konstitusionál, Gil da Costa Alves, bainhira hetan omenajen iha Parlamentu Nasionál husi deputadu sira, sesta 22 Marsu 2019. Imajen António Gonçalves

DILI (TATOLI) – Parlamentu Nasionál (PN) liuhusi Bankada Parlamentár, rekoñese  matebian Gil da Costa Alves nia obra iha prosesu konstrusaun estadu.

Obra ne’ebé matebian Gil Alves, kontribui ba konstrusaun estadu dezde asume knar nudár membru Parlamentu Nasionál iha II Lejislatura   to’o hetan fiar asume mós Ministru Turizmu, Komérsiu no Indústria  (MTKI) iha tinan 2007 to’o  tinan 2012.

Ho rekoñesimen

Ofisiais membru PNTL lori Mate Isin Eis Ministru MTCI IV Governu Konstitusional,Gil da Costa Alves ba Salaun Plenaria Parlamentu Nasional hodi Presta Omenajen husi Deputadu sira, Sesta 22 Marsu 2019. Imajen Antonio Gonçalves

tu ba obra matebian Gil da Costa Auxiladora Nheu Alves nian ne’e, ohin, Parlamentu Nasional halo plenária sesaun solene hodi presta omenajen ikus ba antigu Deputadu husi Bankada ASDT (Asosiação Social Democrata de Timorense) ne’e.

 

Matebian Gil Alves  hakotu iis iha loron Domingu 17 Marsu, foin lalais ne’e,  iha Hospital Nasionál Guido Valadares (HNGV) tanba moras fuan.

Iha intervensaun sesaun solene ne’e, Deputada Bankada Fretilín, Nélia Soares Menezes, rekoñese kontribuisaun obra matebian Gil Alves nian iha prosesu konstrusaun Estadu ne’ebé fizikamente eziste hela.

“Uitoan ka barak, matebian durante nia mandatu nu’udar membru governu fó mós nia kontribuisaun iha ba obra balun ne’ebé agora daudauk  iha ita nia let.  Ba ida ne’e ita orgullu”, hateten  Deputada Nélia Menezes.

Vise Bankada CNRT, Patrocínio Fernandes dos Reis, fó sasin mós katak, matebian Gil Alves nu’udar titular deputadu husi ASDT iha II Lejislatura tinan 2007 to’o 2012, hafoin ne’e simu kargu nu’udar Ministru Turizmu Komérsiu no Industria (MTKI) iha IV Governu Konstitusionál ne’ebé xefia husi Kayrala Xanana Gusmão.

Matebian Gil Alves, mak hahú introdús programa inovasaun no insentivu ba produsaun agríkola no armajementu ai-han, fatin distinsaun turista no harii instituisaun públiku lubuk ida ne’ebé mak tutela ba MTKI hodi nune’e instituisaun hirak ne’e buras daudaun ho dezempenhu ne’ebé aas hodi tane ita nia povu tomak.

Oan no Familia lori retratu Eis Ministru MTCI IV Governu Konstitusional,Gil da Costa Alves ba Salaun Plenaria Parlamentu Nasional hodi Presta Omenajen husi Deputadu sira, Sesta 22 Marsu 2019. Imajen Antonio Gonçalves

Nia mós hanesan fundadór ba Câmara Comérçio Industria Timor-Leste (CCI-TL) hodi kontribui  halo ona mudansa ba dezenvolvimentu setór privadu nian no haforsa aliserse ekonomia nasionál hafoin Timor-Leste hasoru krize polítika, militár, sosiál no ekonomia iha tinan 2007 to’o 2012.

“Nia dedikasaun ba rai ida ne’e sei sai eransa pozitivu ba timoroan hotu hodi kontinua kompleta di’ak liután. Ami sente triste Gil Alves la hamutuk ona  hodi kompleta obra inovativu ne’ebé nia rai hela ba ita, ho espíritu kontinuidade luta ba dezenvolvimentu nasionál, nune’e ita sei realiza mehi matebian nian”,  tenik Patrocínio Fernandes dos Reis.

Membru PN husi Bankada PLP, Noé da Silva Ximenes hateten, eis Deputadu ne’e nu’udar ema ne’ebé ativu iha polítika Timor-Leste hafoin restaurasaun Independénsia no rekordasaun ne’ebé matebian  husik hela iha Magna Casa ida ne’e, sai ona valor no folin tebes iha prosesu konstrusaun Estadu no dezenvolvimentu País ida ne’e nian.

Deputada Bankada Khunto, Olinda Guterres  ho mós Xefe Bankada UDT/FM, Gilman Exposto dos Santos, fó sasin mós katak, matebian nia kontribuisaun ba dezenvolvimentu povu no rai ne’e boot tebes.

Gilman Santos lembra hikas katak, rekordasaun boot ida ne’ebé povu sei la haluha mak Programa Povu Kuda Governu Sosa.

Deputadu Bankada PD, Adriano do Nascimento dehan loron ne’e loron susar ba membru PN sira tanba lakon ona belun di’ak, tanba PD konsidera matebian Gil Alves nia obra polítika mós sei inspira polítiku sira nia pensamentu lójiku no asaun estratéjika.

“Ita nia liafuan ne’ebé haklaken ba ami nu’udar lider polítiku ida, ami fiar katak sei transforma ami nia hahalok no motiva ami nia esperansa hodi haknaar an iha vida polítika partidária”, Adriano Nascimento hateten.

Gil Da Costa Auxiliadora Nheu Alves, moris iha 17 Setembru 1958 iha Maubara, Liquiça no oan husi Libório Marques Alves ho Maria de Fátima Nheu Alves.

Jornalista: Julia Chatarina

Editór: Francisco Simões

HAKEREK NO HATÁN

Please enter your comment!
Please enter your name here