Ministru Reforma Lejizlativa no Asuntu Parlamentár, Fidelis Manuel Leite Magalhães. Imajen António Gonçalves

DILI, (TATOLI)—Membru Governu, kompostu husi Primeiru Ministru, ministru, vise ministru to’o sekretáriu estadu hotu, iha obrigasaun atu tane ás étika funsaun públiku hodi asegura  governasaun di’ak ba serbí interese públiku.

Atu fundamenta palavra sira étiku ba membru Governu  sira, governu da-ualu, ne’ebé lidera husi Primeiru Ministru (PM), Taur Matan Ruak, liu husi Konsellu Ministru, loron 20 fulan Fevereiru, hasai rezolusaun Governu númeru 12/2019, loron 13 fulan Marsu 2019, ho total artigu 13, atu bele sai nudár mata dalan ba  serbisu no atendimentu membru governu nian.

Iha artigu lima (5) husi kódigu étika ne’e bandu ka proibe  membru governu atu simu subornu ho objetivu atu prevene korrupsaun iha instituisaun governu nia laran. Nune’e, iha mós iha artigu 12 ko’alia kona-ba asédiu seksuál hodi proibe, membru Governu sira halo pratika aktu asédiu seksuál ne’ebé definidu ona iha lei komisaun funsaun públika númeru 12/2017 , 9 Agostu, kona-ba prevensaun no kombate asédiu seksuál iha funsaun públika.

Ministru Reforma Lejizlativa no asuntu  Parlamentár, Fidelis Manuel Leite Magalhães hatete, kódigu konduta ne’e ezije membru Governu sira atu iha étika ne’ebé ás bainhira hala’o funsaun no kna’ar nu’udar membru Governu.

Dokumentu kode étiku governu ne’e ko’alia kona-ba objetu, aplikasaun rasik, prinsípiu ba interese públiku, legalidade, imparsidade no igualdade iha desizaun sira, tenke iha integridade, onestu, urbanizada, sivilizadu, garante konfidensialidade no prudente halo desizaun tuir lei no konstituisaun.

“Iha artigu 5 membru governu sira tenke pro-ativu prevensaun ba kombate korrupsaun, membru governu sira tenke deklara bainhira iha desizaun ruma ke konflitu interese. Ezemplu, se ha’u foti desizaun ida kona-ba matéria ida iha ne’ebé ha’u nia kaben  ka ha’u nia maun , alin ka tiun no aman nia interese involve iha laran, ha’u tenke deklara. Katak, se ha’u ministru deklara abertamente ba Primeiru Ministru, sekretáriu estadu no vise ministru sira deklara ba ministru”, afirma Ministru Fidelis Magalães, ohin, iha Palásiu  Governu.

Artigu  5 husi Kódigu ne’e hateten iha lian Portuges dahan, “os membros do Governo devem assumir o compromisso de prevenir e de combater a corrupção, especialmente a corrupção privada, a extersão ou suborn, e estão proibidos.Nune’e, iha artigu 9 fundamenta tan, membru governu sira la bele simu oferta ou prezente ne’ebé nia valór simbóliku liu pasa US$250,00.

“Se derrepente ha’u simu karreta ida ou relozu Rolex ida ne’e ha’u tenke deklara, mais se organizasaun ruma internasionál ida mak fó  tanba arranju protokolár nian entaun simu maibé diretór jerál tenke rejista depois ida ne’e tenke fó fali ba iha apoiu sosiál no ministru sira labele hela ho prezente ne’e”, hateten Ministru Fidelis Magalhães.

Alende ne’e,  labele simu billete husi setór privadu sira hodi pasiar ba estranjeiru no aluga otél luxu ba membru Governu sira.

 “Se membru governu ida viola nia tenke esklarese ba Primeiru Ministru”, afirma Ministru Reforma Legislative no asuntu Parlamentár ne’e.

Jornalista: Agapito dos Santos

Editór: Francisco Simões

 

1 KOMENTÁRIU

HAKEREK NO HATÁN

Please enter your comment!
Please enter your name here