Diretór Nasionál Orsamentu Estadu MF, Salomão Yoaquim. Foto/Mídia MF.

DILI, (TATOLI) – Diretór Nasionál Orsamentu Estadu Ministériu Finansa (MF), Salomão Yoaquim, informa ezekusaun Orsamentu Jerál Estadu (OJE) 2019 la’o ho normál.

Salomão dehan Lei Orsamentu Jerál Estadu 2019 ne’ebé aprova ona husi Parlamentu Nasionál no promulga husi Prezidente Repúblika, Ministériu Finansa lansa ona iha 18 fereveiru OJE 2019 ba liña ministeriál sira atu implementa iha sistema.

“Sistema mós prontu hotu ona no publikasaun ba lei ida ne’e mós publika ona, ita halo ona distribuisaun pakote aprovadu ba liña ministeriál para halo tranzasaun”, Salomão afirma iha MF ohin.

Nune’e ezekusaun ida ne’e la’o ona iha 18 fevereiru, signifika simu-simu pakote ne’e entaun hahú kedan ezekusaun OJE 2019 nian.

“Agora, en termu dekretu ezekusaun ne’ebé oras ne’e daudaun sai hanesan dúvida ba públiku, loos, ita seidauk públika, tanba sei iha redasaun finál husi aprovasaun Konsellu Ministru”, nia dehan.

“Aprova ho kondisaun redasaun finál ajustamentu, ida ne’e maka seidauk publika, la signifika katak dekretu ne’e seidauk publika maka seidauk halo tranzasaun orsamentu, la’ós, tanba dekretu ne’e rasik mai husi tinan anteriór sira, ita lori ninia baze ne’e mai husi Lei Orsamentu Jerál Estadu 2019. Ida hatuur iha dekretu ezekusaun ne’e, no mós fonte fundamentu seluk lori husi Lei Jestaun Finanseira, mai hatuur hotu iha ne’e sai regra ne’ebé atu hatutan husi lei rua ne’e”.

Tanba ne’e porsentu 90 regra husi lei rua ne’e mai iha dekretu ezekusaun. “La signifika atividade hotu ne’ebé ita hatuur ona iha Orsamentu Jerál Estadu 2019 tenke hein dekretu ne’e”.

Nia hatutan tan: “Ba atividade sira normál ne’e la’o hela, ba atividade balun ne’ebé refleta ba regra foun ne’e entaun tenke hein mós dekretu ne’e publika para sai baze ba ezekusaun”.

Iha atividade balun, nia afirma identifika tenke presiza dekretu ne’e tanba iha regra foun regula ba ida ne’e, maibé maioria atividade hotu-hotu normál, bele ezekuta.

Kona-ba dekretu ezekusaun ne’ebé aprova ona iha Konsellu Ministru ho kondisaun halo ajustamentu ho redasaun finál ne’e iha Gabinete Primeiru-Ministru nia serbisu, kuandu ne’e finál ona submete ba publikasaun.

Entretantu ministériu hotu-hotu agora ezekuta, maibé iha parte tékniku ne’ebé dedika án iha área finansa públika husu no hakarak ka’er dekretu ezekusaun para sai hanesan baze ida ba sira.

“Maibé dekretu ida ne’e mós porsentu 10 ba regra foun balu, porsentu 90 ne’e mai husi lei rua ne’e (Lei OJE 2019 no Lei Orsamentu no Jestaun Finanseira)”.

Sobre ezekusaun OJE 2019 to’o ohin loron tuir Portál Transparénsia Orsamentál Timor-Leste nian hatudu husi totál despeza hamutuk $1,482,000,000.00, kompromisu $71,499,943.90, obrigasaun $87,919,696.90, atuál $146,401,069.17, saldu $1,176,179,290.03, atinje ona porsentu 15.8

Notísia relevante :

Governu Aprova Dekretu Ezekusaun OJE 2019

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here