Membru PNTL sira lori mate-isin eis-Ministru hosi IV Governu Konstitusionál, Gil da Costa Alves, ba Parlamentu Nasionál hodi presta omenajen husi deputadu sira. Sesta 22 Marsu 2019. Imajen Antonio Goncalves

DILI, (TATOLI) – Eis Ministru iha governasaun da-haat ne’ebé lidera hosi Kay Rala Xanana Gusmão, Gil da Costa Alves, nia mate isin haloot ona iha semitériu Bekusi, ohin hafoin selebra misa ba matebian iha Igreja Maria Imaculada Conceição Katedral ne’ebé prezide hosi padre Emanuel Lelo Talok, CMF.

Padre selebrante iha ninia omilia hatete viajen moris iha mundu iha opsaun rua de’it; moris no mate. Moris ne’e peregrinasaun provizóriu ida iha mundu no mate maka dalan ikus hodi fila ba moris rohan laek.

Tanba ne’e durante peregrinasaun iha mundu tenke haka’as aan atu hadi’a aan sai ema di’ak hodi hetan salvasaun ba moris rohan laek bainhira mate, katak amu.

“Ba família enlutada, ami hato’o ami nia orasaun atu tulun ita-boot sira atu forsa nafatin no orasaun atu matebian bele hetan moris rohan laek”, afirma Amu Pároku São José Ai-Mutin.

Mate-isin eis-Ministru IV Governu Konstitusionál, Gil da Costa Alves, bainhira hetan omenajen iha Parlamentu Nasionál husi deputadu sira, sesta 22 Marsu 2019. Imajen António Gonçalves

Gil Alves mate iha Ospitál Nasionál Guido Valadares (HNGV-sigla portugés), domingu, (17/3/2019) ho idade 60 tanba sofre korasaun.

Gil Alves nu’udar fundadór no Vise Prezidente ba Sentru-Asaun Sosiál Demokrata Timor (C-ASDT- sigla portugés).

Nia hahú karreira polítika hanesan membru no sekretáriu jerál ba partidu Asosiasaun Sosiál Demokrata Timor (ASDT) ne’ebé lidera hosi saudozu Francisco Xavier do Amaral (proklamadór independénsia Timor nian iha 1975).

Eleisaun parlamentár 2007, ASDT halo koligasaun ho Partidu Sosiál Demokrata (PSD), konsege hetan kadeira 11. Hosi kadeira ne’e Gil Alves okupa númeru dahuluk iha parlamentu. Nune’e bainhira forma governu ho naran Aliansa Maioria Parlamentár (AMP),  koligasaun CNRT, PD, UNDERTIM, koligasaun ASDT/PSD. Matebian okupa kadeira ezekutiva nu’udar Ministru Turizmu, Komérsiu, no Indústria.

Entretantu iha 2015, lideransa Gil Alves iha ASDT remata, no funda fali partidu C-ASDT, ikus koliga ho partidu Movimentu Sosiál Demokrata (MSD) hodi konkorre iha eleisaun antesipada 2018, maibé hetan de’it votu ho porsentu 0,5.

Biografia

Oan no família lori retratu eis-Ministru hosi IV Governu Konstitusionál, Gil da Costa Alves ba Parlamentu Nasionál hodi presta omenajen husi deputadu sira, sesta 22 Marsu 2019. Imajen António Gonçalves

Gil da Costa Auxiliadora Nheu Alves, moris iha loron 17 fulan-setembru 1958, iha Maubara, munisípiu Likisá. Oan husi Libório Marques Alves no Maria de Fátima Nheu Alves.

Komesa nian eskola iha eskola primária Madres  Balidi 1965 no kontinua nia akadémika iha Semináriu Nossa Senhora de Fátima Dare.

Entre períodu 1973 to’o 1975, frekuente Curso Geral dos Liceu, iha ne’ebé sai alunu ho prestasaun di’ak iha territóriu portugés hotu iha tempu koloniál nian.

Entre 1978-1981, ensinu sekundáriu iha Malang-Indonézia ne’ebé termina ho “mellor index prestasaun” iha Indonézia tomak.

Sai mós fundadór ba English Conversation Club iha ensinu sekundáriu Malang ne’ebé eziste to’o ohin loron.

Iha 1982, hahú nia lisensiatura iha Administrasaun, Jestaun, no Ekonomia iha Universidade Atma Jaya iha Jakarta, no akaba nia estudu iha Universidade Atma Jaya, Jogjakarta, no sai asistente dosente iha Fakuldade Ekonomia iha instituisaun ne’e entre períodu 1990 to’o 1993.

Durante Timór-Portugés, sai membru junior grupu lendáriu “Os Cinco do Orinte”. Iha tempu okupasaun Indonézia, sai membru grupu “Five Fingers”.

Perkursu Gil da Costa Alves, enkuantu artista, markadu ho ézitu hanesan “Maun-Alin Timoroan” ne’ebé gravadu iha Karavana Artístika, volume dahuluk ne’ebé maka influénsia no inspira emosaun joven universitáriu timoroan, motiva konkretamente estudante ida ne’ebé ohin loron sai médiku.

Iha 20 abríl 1982, kaben ho Aida Maria da Conceição Osório Soares, iha Jakarta, ne’ebé husi sira-nia kazamentu ne’e “fó fini moris” na’in-neen, Gilson, Levy, Ricardo, Messias, Donato no Gracinha. Iha mós bei-oan na’in-rua, Gian no Jovia, husi oan dahuluk nian.

Gil Alves, susesu iha nia akadémiku no esforsu buka moris ida prósperu. Fila mai Dili, ho nia espíritu empreendedorizmu no sai emprezáriu ida susesu iha nia tempu.

Iha nia karreira emprezariál, iha 2002, sai hanesan fundadór ba Kámara Komérsiu Indústria, ne’ebé ho objetivu atu insentiva no dudu ekonomia nasionál.

Karreira polítika nu’udar ministru, husik hela marka liuhusi medida adosaun iha ámbitu oioin, kria instituisaun sira hanesan Sentru Lojístika Nasionál, AIFAESA no Inspesaun Jerál Jogu nian.

Aléinde ne’e nia obra markante sira hanesan Sentru Konvensaun Dili, jardín Largo Lesidere, no arranja Areia Branka no Kristu Rei, merkadu Taibesi, merkadu Manleuana, Pouzada Tutuala, Ataúru, Same, Maubisi, no Fatu Builiku.

Durante nia mandatu dedika an mós ba promosaun no monitorizasaun eventu sira iha ámbitu turizmu nian, hanesan tinan-tinan “Regata Iate Darwin” no Kultura Karnavál, entre eventu internasionál sira seluk.

Iha nivel polítika esterna, koloka adidu Komérsiu iha embaixada Timor-Leste, eskolla jeo-estratéjika, ho objetivu dinamiza investimentu esternu no promosaun no komersializasaun produtu lokál.

Perkursu polítiku Gil Alves markadu iha asaun oioin ne’ebé karateriza nia mandatu no sempre permanense iha memória povu Timór.

Gil Alves, tuir testemuña sai mellor kuadru iha jerasaun foun, ho pensamentu ligadu ba razaun no lójika, liuliu iha área ekonomia nian.

Dedikasaun Gil Alves, hetan rekoñesimentu internasionál iha 2009, sai Vise-Prezidente Asembleia Jerál Organizasaun Mundiál Turizmu nian iha reprezentasaun nasaun Azía Pasífiku, enaltese (hamorin) Timor-Leste nia naran no mós simu medalla Orden de Malta husi nia prestasaun iha área turizmu iha 2002.

Nia vizaun nasionalizmu ne’ebé kle’an, liuliu buka povu Timor-Leste nian moris di’ak, hatudu durante nia funsaun bainhira sai Ministru Turizmu, Komérsiu no Indústria.

Atualmente, Gil Alves, ezerse nia funsaun hanesan Vise-Prezidente Kámara Komérsiu no Indústria ba asuntu CPLP no ASEAN, ne’ebé eleitu ba kargu ne’e durante períodu tinan haat.

Gil Alves ema ida simple, umilde, atensiozu, amigu, jovial, estrovertidu, liuliu hadomi moris, iha liña hotu, hanesan aman, la’en, avó, irmaun, tiu, primu no amigu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here