Sekretáriu Estadu Formasaun Profisionál no Empregu (SEFOPE), Julião da Silva, no Ministru Negósiu Estranjeiru no Kooperasaun (MNEK), Dionísio Babo Soares. Foto/MNEK.

DILI, (TATOLI)–Sekretáriu Estadu Formasaun Profisionál no Empregu (SEFOPE), Julião da Silva, akompaña husi Ministru Negósiu Estranjeiru no Koopersaun (MNEK), Dionísio Babo Soares, sei halo negosiasaun ho Governu Japaun kona-ba vontade Japaun nian atu absorve traballadór timoroan iha merkadu Japaun.

Atu aprofunda liu negosiasaun ne’e iha nia politika implementasaun, maka SEFOPE  Julião da Silva ho MNEK Dionísio Babo, sei dezloka bá Japaun iha semana oin. “Haruka timoroan sira bele bá aprende serbisu no bele hetan oportunidade balun  iha Japaun, tanba ne’e, semana oin, ami sei dezloka bá Japaun”, informa Sekretáriu Estadu Julião da Silva, ohin, iha Kaikoli, Dili.

Durante estadia iha sidade Tokyo, delegasaun SEFOPE ho MNEK mós sei  halo vizita ba sentru formasaun no haree indústria ho merkadu saída mak Japaun iha hodi bele oferese mai timoroan. Nune’e, SEFOPE fila mai Timor bele dezeña ona polítika traballu nian tuir nesesidade merkadu Japaun nian

Julião da Silva, informa katak, nia parte mós sei hasoru malu ho Ministru Traballu Japaun hodi ko’alia kona-ba polítika saida maka Japaun iha no oinsá maka Timor-Leste bele adere ba sira-nia programa haruka traballadór.

Ministru Negósiu Estranjeiru no Kooperasaun (MNEK), Dionísio Babo Soares, afirma hikas katak,  atu bele iha interasaun di’ak liu ho Governu Japaun kona-ba posibilidade ne’e maka nia parte ho SEFOPE  sei dezloka ba Japaun.

“Ami bá hamutuk atu halo serbisu rua. Ida, kona-ba serbisu bilaterál entre ita ho Japaun. Seluk fali, serbisu bilaterál mós iha relasaun ho posibilidade ba Japaun bele simu, karik, ita-nia ema serbisu iha ne’ebá”,  informa Ministru Dionisio Babo, foin lalais ne’e, iha Palásiu Governu.

Notísia relevante :http://www.tatoli.tl/2019/03/mnek-ho-sefope-sei-esplora-posibilidade-japaun-simu-traballador-timoroan/

Foin lalais ne’e, liu husi reuniaun Konsellu Ministru (KM) hasai desizaun hodi fó podér ba SEFOPE atu asina akordu ho Governu Austrália kona-ba Pacific Labour Scheme (PLS). Tanba ne’e, fila husi vizita ba Japaun sei komunika fali ho Embaixada Australia nian iha Timor-Leste atu oinsá halo preparasaun no ajenda ba  asina memorandu entendimentu ho Governu Australia ne’ebé sei hala’o iha Australia.

Lee mós :http://www.tatoli.tl/2019/03/km-fo-mandatu-ba-sefope-atu-asina-akordu-pls-ho-governu-australia/

Durante auzénsia SEFOPE nian iha Timor-Leste, Sekretáriu Estadu Kooperativa (SEKOOP), Arsénio Pereira da Silva, maka sei sai interinu hodi tau-matan ba polítika serbisu  SEFOPE nian.

“Durante SEFOPE nia auzénsia, saida maka ha’u bele halo hamutuk ho diretór jerál, nasionál ho institutu sira iha SEFOPE nia okos, ida ne’e maka ami hasoru malu”, hateten SEKOOP, Arsénio Pereira, hafoin sorumutu ho SEFOPE.

Aproveita sorumutu ne’e, parte rua mós ko’alia koordenasaun serbisu atu bele evita ezekusaun servisu ne’ebé overlapping (butuk).  “Atu konkretiza ida ne’e, tenke liuhusi dokumentu balu, ne’ebé SEFOPE ho Kooperativa fó hanoin kedan ona para ekipa téknika bele tuur hamutuk prepara dokumentu ruma bele asina iha futuru. Ida ne’e hanesan kesi liután serbisu sira ne’ebé la’ós iha koordenasaun informál de’it, maibé ho dokumentu”,  hateten Arsénio Pereira.

Jornalista: Maria Auxiliadora

Editór: Francisco Simões

HAKEREK NO HATÁN

Please enter your comment!
Please enter your name here