Primeiru-Ministru, Taur Matan Ruak. Imajen Egas Cristovao

DILI, (TATOLI) – Primeiru-Ministru (PM), Taur Matan Ruak, hateten lalubur (inundasaun) akontese tanba tinan barak komunidade la halo limpeza di’ak no sidade dezorganizadu, katak ema ida-idak halo nia uma iha bee dalan.

“Felizmente ita laiha problema hanesan iha Indonézia, Mozambique no Austrália ne’ebé ema mate barak. Maske iha ita nia rain akontese lalubur maibé rezulta ema ida de’it maka mate”, dehan ba jornalista sira iha Palásiu Prezidente Nicolau Lobato, Bairru Pité, kinta ne’e hafoin soru-mutu ho Prezidente Repúblika, Francisco Guterres Lú Olo, kona-ba kestaun inundasaun ne’e.

Nia husu ba komunidade atu ajuda kontribui ba limpeza, katak labele soe lixu arbiru iha bee dalan (ezgotu).

“Sidadaun nia kontribuisaun importante loos. Dala barak dehan governu esforsa lori sidade ba foho maibé ita nia populasaun lori fali foho mai iha sidade”, afirma.

Xefe Governu hatutan Governu presiza planu integradu ida oinsá maka atu rezolve problema ne’e liu-liu buka dalan oinsá dezenvolve munisípiu sira para evita komunidade konsentra iha Dili.

Aleinde ne’e, nia tenik halo rekualifikasaun ba sidade Dili, liu-liu kria urbanizasaun ida ne’ebé organizadu liu.

“Ami espera katak iha tinan hirak oin mai ita hahú halo uma ba sidadaun para organizadu liu, nune’e labele sai hanesan agora ne’ebé halo uma fali iha bee dalan”, katak.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here