Vise-Ministru Saúde Bonifácio Maukoli dos Reis. Foto António Goncalves

DILI, (TATOLI) – Postu saúde ne’ebé maka durante ne’e harii iha timor laran tomak hamutuk 400 resin maibé menus liu maka iha munisípiu Bobonaru, Ermera no Kovalima.

“400 resin postu saúde maka ita harii ona no sei reabilita tan balun, postu saúde hirak ne’ebé uluk konstrui iha tempu Indonézia maibé iha munisípiu Bobonaru, Ermera ho Suai (Kovalina) mak menus liu”, Vise Ministru Dezenvolvimentu Estratéjiku Saúde, Bonifácio Maukoli, ba jornalista sira hafoin hasoru Xefe Governu, Taur Matan Ruak, iha Palásiu Governu, ohin.

Maske nune’e, Maukoli haktuir iha ona faze planeamentu ba suku 100 resin ne’ebé maka seidauk iha postu saúde.

Maibé tinan ne’e avansa ho konstrusaun postu saúde 10 resin no kompleta kedan ho rezidénsia inklui nesesidade bázika atu pesoál saúde sira bele hela ho seguru, nune’e bele fó atendimentu di’ak ba komunidade.

Tinan ne’e ministériu saúde halo konstrusaun postu saúde neen ba munisípiu Bobonaru, lima ba Ermera.

Maibé postu saúde hirak ne’e balun hetan apoiu hosi parseiru dezenvolvimentu hanesan Governu Japaun. Nune’e la kleur tan sei iha lansamentu postu saúde iha Rai-Laku inklui Bobonaru.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here