Komandante Jerál Polísia Nasionál Timor-Leste (PNTL), Komisáriu Júlio da Costa Hornay ho nia adjuntu Komandante Jerál PNTL, Komisáriu Faustino da Costa, bainhira dadalia ho jornalista sira iha Palásiu Prezidente Nicolau Lobato, ohin meiudia.

DILI (TATOLI)—Komandante Jerál Polisia Nasionál Timor-Leste (PNTL), Komisáriu Júlio da Costa Hornay, fiar ho kapasidade lideransa no jestaun husi Faustino da Costa ho Mateus Fernandes, atu kompleta malu hodi kontinua lidera instituisaun PNTL ba períodu 2019-2023.

“Ha’u orgullu tebes tanba misaun hanesan komandante jerál PNTL bele ramata, maibé konsege la’o to’o tinan haat kompleta no ida ne’ebé substitui ha’u ne’e mós ha’u nia segundu komandante jerál no komandante operasaun ho administrasaun”, hateten Júlio  Hornay ba jornalista sira, ohin, iha Palásiu Prezidente Nicolau Lobato, Bairru Pité, Dili.

Júlio Hornay dehan, sei laiha difikuldade ida tanba Segundu Komandante Jerál PNTL la’ós mai Segundu Komandante Jerál de’it, maibé liuhusi serbisu lubuk ida nu’udar Komandante PNTL Munisípiu, Departamentu Justisa PNTL, Inspesaun Jerál, hasai kursu barak kona-ba serbisu polísia no seluseluk tan.

“Ami na’in rua hamutuk iha tinan haat ne’e hatene di’ak liu serbisu sira ne’e no difikuldade. Aleinde ne’e, Komandante Administrasaun Mateus Fernandes, ne’ebé eleitu sai Segundu Komandante Jerál ne’e mós la’ós ema leet ,maibé iha esperiénsia serbisu lubuk ida ne’ebé sei suporta Komandante Jerál atu bele lori instituisaun ne’e ba oin”, afirma  Júlio Hornay.

Komisáriu Júlio Hornay   sei hato’o relatóriu serbisu tinan haat nian ba entidade Estadu sira hotu, liuhusi serimónia aniversáriu PNTL no tomada pose Komandante Jerál PNTL eleitu, Faustino da Costa ho Segundu Komandante Jerál PNTL, Mateus Fernandes iha loron 27 Marsu, tinan ne’e.

“Ami nia mandatu tinan haat ne’e atravesa situasaun serbisu ne’ebé di’ak uitoan. Ami hakur  situasaun orsamentu ne’ebé problemátiku katak, dalaruma la’o de’it ho duo-désimu no impase polítika, maibé ami kontinua hala’o misaun ho responsabilidade”, hateten Komisáriu Júlio Hornay.

Jornalista: Xisto Freitas

Editór: Francisco Simões

HAKEREK NO HATÁN

Please enter your comment!
Please enter your name here