Ministru Agrikultura no Peskas Joaquim José Gusmão dos Reis Martins, Imajen/ Egas Cristovão

DILI, (TATOLI) –  Governu liuhosi Ministru Agrikultura no Peska (MAP), Joaquim José Gusmão dos Reis, hateten sei muda Sekretariadu Konsellu Nasionál Seguransa Alimentár Timor-Leste (KONSANTIL) hodi tutela iha Gabinete Primeiru-Ministru (PM).

“Ami husu permisaun Primeiru-Ministru atu estabelese Sekretariadu KONSANTIL iha Gabinete  Xefe Governu”, Governante ne’e ba jornalista sira hafoin hasoru Xefe Ezekutivu, Taur Matan Ruak, iha Palásiu Governu, ohin.

Atividade KONSANTIL nian durante ne’e maka haree seguransa ai-han no nutrisaun, ho nune’e maka husu permisaun Xefe Governu atu monta fali Sekretariadu KONSANTIL mai Gabinete PM.

Nune’e sekretariadu bele kobre atividade tomak KONSANTIL nian komesa hosi nivel ministériu, nivel tékniku to’o nivel munisípiu.

Joaquim haktuir durante ne’e KONSANTIL tutela iha MAP, maibé atu muda ba Gabinete Primeiru-Ministru ho razaun atu atividade KONSANTIL nian hotu tenke iha koordenasaun ho ministériu sia hanesan MAP, Ministériu Saúde, Ministériu Solidariedade Sosiál no Inkluzaun, Ministériu Edukasaun (ME), Ministériu Komérsiu Indústria no Ambiente, Ministériu Finansa, Ministériu Obra Públika Sira, Ministériu Administrasaun Estatál no Sekretária Estadu Formasaun Profisionál no Empregu.

Entretantu, tuir Joaquin semana oin iha reuniaun Konsellu Ministru, MAP sei aprezenta estatutu KONSTANTIL nian atu bele hetan aprovasaun.

Jornalista: Zezito Silva

Editora: Rita Almeida

HAKEREK NO HATÁN

Please enter your comment!
Please enter your name here