Ministru Transporte no Komunikasaun (MTK), José Agostinho da Silva

DILI, (TATOLI) – Ministériu Transporte no Komunikasaun (MTK), ohin simu responsabilidade hosi Konsellu Ministru (KM) hodi asina akordu kona-ba vou internasionál, hafoin ministru José Agostinho da Silva hato’o preokupasaun ne’e ba KM.

“Ministru husu podér tomak no Konsellu Ministru ho mandatu konsede (fó) podér atu asina akordu, tulun rezolve problema ne’ebé oras ne’e daudaun ita enfrenta”, tenik Ministru Estadu Prezidénsia Konsellu Ministru, Hermenegildo Augusto Cabral Pereira, ba jornalista sira iha Palásiu Governu hafoin enkontru KM, ohin.

Nia hatutan: “Uluk ita preokupa liu ho folin maibé agora ita preokupa ho Silk Air ne’ebé atu hapara operasaun, ne’ebé ligasaun Timor-Leste ho Singapura ne’e kotu”.

Tanba ne’e liuhosi diskusaun ezekutivu sira, MTK no Ministériu Negósiu Estranjeiru no Kooperasaun (MNEK) koordena hodi tempu badak Ministru José Agostinho bele dezloka ba Kuala Lumpur, Malázia hodi asina akordu entre Governu rua, nune’e fasilita prosesu liña transporte aéreu bele atu semo iha Timor-Leste.

Entretantu, vou Silk Air ligasaun Dili-Singapura ne’ebé opera husi kompañia Air Timor hanesan vou charter no úniku vou sei remata kontratu iha loron 30 marsu 2019 maibé kontratu ne’e la rasik la extende.

Iha biban hanesan KM mós rona aprezentasaun husi Ministériu Planeamentu no Investimentu Estratéjiku (MPIE) konaba Fibra Ótika.

“Konsellu Ministru rona aprezentasaun husi MPIE kona-ba Fibra Ótika maibé tanba kontinua hela  halo negosiasaun, ami seidauk bele fó detallu ba ita boot sira, kuandu konklui ona Konsellu Ministru bele partilla hodi bele avansa prosesu”, akresenta.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here