Ministru Prezidensia Konsellu Ministru, Hermenegildo Augusto Cabral Pereira.

DILI, (TATOLI) – Konsellu Ministru (KM) liuhusi reuniaun ohin fó ona mandatu ba Sekretáriu Estadu Formasaun Profisionál no Empregu (SEFOPE), Julião da Silva, atu asina akordu ho Governu Austrália kona-ba Pacific Labour Scheme (PLS) nian.

Podér ne’e entrega hafoin SEFOPE aprezenta memorandu entendimentu no atualizasaun ida kona-ba traballadór sira atu bá Austrália iha soru-mutu KM nian.

“Iha modalidade foun bolu Pacific Scheme, ida ne’e inklui Timor-Leste no modalidade foun hanesan envezde fulan neen-neen de’it, bele bá fulan sia, bele bá to’o tinan tolu no hasa’e mós númeru traballadór Timor-Leste nian atu bá Austrália”, Ministru Estadu Prezidénsia Konsellu Ministru, Hermenegildo Augusto Cabral Pereira, ba jornalista sira hafoin reuniaun KM iha Palásiu Governu, ohin.

Ministru Hermenegildo dehan SEFOPE husu plenu podér husi KM, nune’e bele avansa prosesu rekrutamentu, fó empregu ba timoroan sira.

Iha 2018, bainhira Asistente Ministra ba Dezenvolvimentu Internasionál no Pasífiku husi Austrália, Senadora Anne Ruston, vizita kortezia ida iha SEFOPE, ne’e hatudu sinál pozitivu tebes.

Atu hatene di’ak liután oinsá mak Governu Austrália kontinua suporta Programa Serbisu Sazonál, hanesan uluk servisu iha Austrália ho fulan neen, agora Austrália iha kompromisu atu hasa’e tan ba fulan sia.

Aléinde ne’e Austrália iha inisiativa atu suporta tan Timor-Leste hola parte iha programa PLS.

Programa ne’e sei permite traballadór timoroan sira atu serbisu iha indústria ne’ebé kapasidade báziku ho médiu no serbisu to’o tinan tolu iha Austrália.

Programa ne’e nasaun neen maka serbisu ona no Timor-Leste tama ba dahituk.

Antes ne’e, iha entrevista ho TATOLI, Sekretáriu Estadu Julião da Silva, hatete SEFOPE ho Governu Austrália hahú ona halo ezersísiu kona-ba akordu PLS nian atu nune’e iha tempu badak bele asina.

“Iha Austrália ne’e ita hetan programa ida ne’ebé iha tempu badak atu asina akordu ne’e maka kona-ba PLS. Nia bá serbisu la’ós fulan neen, mas bá tinan tolu maibé ne’e kada tinan presiza ema liu husi rihun ida”, Julião katak.

Sekretáriu Estadu ne’e dehan kona-ba PLS ne’e depende ba empreza sira presiza ema, maibé Timor-Leste mós tenke prepara nia ema tanba iha diferensa entre serbisu sazonál ho PLS nian.

“Diferente maka bá serbisu fulan neen ne’e unskilled labour (la’ós kualifikada), agora, bá tinan tolu ne’e tenke iha skilled labour (serbisu kualifikada), signifika tenke formadu ona mak bá. Ezemplu, ema presiza karpinteiru entaun tenke ema formandu iha karpinteiru mak bá”.

Julião hatutan iha tinan ne’e PLS presiza ema liu husi 1000, maibé daudaun ne’e Timor-Leste sei haree uluk MoU (memorandum of understanding ou nota entendimentu) hafoin bele haree prosesu tuirmai no bainhira akordu ne’e iha ona maka timoroan balun bele dezloka.

PLS ne’e programa ida husi Governu Australianu ne’ebé hahú iha jullu 2018, no fó dalan ba traballadór sira iha nasaun oioin husi rejiaun pasífiku sira hotu atu kandidata aan hanesan serbisu-na’in ho kualifikasaun ki’ik no natoon iha área rurál Austrália nian.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here