Koordenadora Ensinu Básiku Filiál Kamea, Idalina Soares. Imajen Egas Cristovão

DILI, (TATOLI) – Eskola Bázika Filiál (EBF) Kamea, Bekora liuhosi koordenadora eskola husu ba Ministériu Edukasaun atu toma konsiderasaun tanba falta manuál lian-tetun, portugés no mós aula aprendizajen.

“Manuál ba kintu no sestu anu, liuliu ba matéria dalen tetun ho portugés ne’e la to’o, tanba hanorin dalen tetun manuál ne’e profesór mesak kaer alunu sira laiha entaun aula la’o la di’ak”, dehan responsavel eskola, Idalina Soares, ba jornalista sira iha Bekora, ohin.

Enkuantu manuál ba primeiru to’o kuartu anu sufisiente ba estudante sira atu uza hodi tuir prosesu aprendizajen.

Alende ne’e falta sala aprendizajen, tanba iha alunu hamutuk 1.176 tanba ne’e kada sala tenke akumula estudante kuaze 70. “Agora daudaun iha sala sia, kada sala ne’e akumula estudante hosi 60 to’o 70”, realsa.

Ba karteira, nia dehan hato’o ona proposta ba ministériu edukasaun antes ferias iha  tinan kotuk maibé seidauk distribui.

Eskola ne’e ho totál profesór hamutuk 25, permanente 21 no kontratadu na’in haat.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here