Nasreen Habib, sub-editor Assam Tribune ho Khin MG Myint, membru Grupu Traballu Myanmar. Imajen/Francisco Simões

BALI, (TATOLI)–Haree husi oklu matan nian kona-ba dezenvolvimentu iha rai Myanmar ho India, kompara karik ho Timor-Leste, maka Timor hakat dala ida, no India ho Myanmar bele dehan, hakat dala sanulu (10). Maibé, susesu dezenvolvimentu husi nasaun rua ne’ebá la balansu ba nia sosiedade tanba sei mosu nafatin diskriminasaun étniku no diskriminasaun relijiaun ne’ebé afeta maka’as liberdade relijiaun no direitus umanus.

“Bainhira ha’u rona aprezentasaun husi ativista Myanmar no sub-editor ida husi Assam Tribune, India, kona-ba diskriminasaun kontra direitus umanus, no refleta ba dezenvolvimentu iha nasaun rua ne’e, ha’u la imajina diskriminasaun ida boot tebes ne’e bele akontese. Afinál, iha Myanmar ho India ‘falun’ sira nia fo’er maka’as loos, kompara karik, hanesan ema dasa fo’er ba tau hamutuk iha tapeti  luxu nia okos.”

Lia hirak ne’e hato’o husi jornalista sira husi Sudeste Aziátika nian, bainhira rona aprezentasaun  husi Khin MG Myint, husi Grupu Traballu Harmonia Myanmar ho Nasreen Habib, nudár sub-editor Assam Tribune-India, iha Semináriu no Workshop Rejionál ba Jornalista ne’ebé organiza husi SEJUK (Serikat Jurnalis untuk Keberagaman) iha Otel Ayodya, Nusa Dua, Bali.

Iha inísiu Agostu, tinan 2018, Estadu Myanmar fó kbiit ba nia militár  hodi halo operasaun kombate rebelde Rohingya, ne’ebé tuir estadu Myanmar rebelde sira nia knuuk iha ema Rakhine. Momentu ne’ebá mós ofisial militár ida mobiliza  ninia maluk militár atus ba atus hodi halo kampaña duni sai ema sivíl étniku Rohingya husi sira nia horik fatin no sunu hotu kedas sira nia uma to’o tetuk hanesan rai.

Tuir reportajen ajénsia notisioza REUTERS nian foin lalais ne’ebé hatutan iha TEMPO Online, katak, militár sira Myanmar lansa kampaña  propaganda hodi dehan, kontra rebelde Rohingya no lansa asaltu mós ba fatin sira étniku Rohingya nian.

Bainhira militante Rohingya halo asalta ba rejiaun sira Rakhine Norte iha fulan Augusto, tinan ida liu ba, maka divizaun militár infantaria  revolta ho asaun duni obrigatóriu étniku Rohingya hamutuk na’in  700.000 ba Bangladesh.

Ho aktu brutal ida ne’e, halo Nasoins Unidus (ONU) hola pozisaun hodi kondena divizaun infantaria rua ne’e halo jenosídiu no Estadu Unidus Amerika rasik hateten, asaun ne’e hanesan aktu kombate total étniku. Maibé, estadu Myanmar dezmente hodi dehan laloos.

Liu husi Semináriu no Workshop ba Jornalista iha Rejiaun Sudeste Aziátiku ba loron datolu nian iha sesaun dahuluk, ohin, Khin MG Myint, husi Grupu Traballu Harmonia Myanmar, fó sasin no introdús ba partisipante sira semináriu no workshop nian katak, aktu jenosídiu no diskriminasaun ba étniku  mosu tanba de’it akuzasaun dehan komunidade sivíl Rohingya mak subar no halo protesaun ba terrorista.

“Buat ne’ebé dada ita nia atensaun mak akuza fali dehan Rohingya sei halo asaun brutalidade no oho hotu se de’it mak sira deskonfia. Ida ne’e, ami haree hanesan tátika ida ne’ebé sira bele hamosu atu dada povu nia simpatia hodi kondena komunidade étnika Rohingya”, hateten Khin MG Myint.

“Ami mós ko’alia ona ho komunidade internasionál no media internasionál sira atu bele fó sai lia loos ba situasaun issue Rohingya,” Khin MG Myint hatutan.

Nia espera atu povu Asian no Asian tomak iha vontade solidariedade  atu bele mobiliza malu hodi fo tulun komunidade sivíl Rohingya atu bele sai husi círculo vicioso ne’e.    Ho emosionál tebes, Khin MG Myint husu ba jornalista sira Sudeste Aziátiku atu bele sai netik ibun no tilun ba komunidade Musulmanu Rohingya, ne’ebé terus la nahas iha mate no diskriminasaun nia laran.  Iha loron 1 fulan Setembru, tinan kotuk,  militár divisi da-33 kaptura joven Rohingya na’in 10 iha  Inn Din no loron tuir mak ho apoiu Suku Rakhine, lansa intimidasaun to’o tiru mate joven lubuk ne’e no sira nia mate isin hakoi hamutuk.

Husi sorin seluk, Nasreen Habib, nudár sub-editor Assam Tribune-India, mós aprezenta ho emosionalmente kona-ba situasaun diskriminasaun iha India hasoru étniku ka relijiaun minoria iha India.

Nia haktuir, to’o tinan 2014, partidu Ideolojia  Direta Hindu (Partidu Bharatiya Janata) kaer podér iha India, komesa halo rejistu nasionál ho naran NRC ho intensaun atu hasai “imigrante ilegál Bangladesh” ne’ebé hahú husi tinan 1971 horik ona iha Distritu Assam, India Leste.

Tuir dadus ikus husi NRC nian ne’ebé públika iha loron 30 fulan Jullu 2018, hatudu, ema husi étniku Bangladesh  ho minoria relijiaun Musulmanu, ne’ebé horik iha rai Assam, India Leste, hamutuk millaun haat (4) mak mate ona. Nain 21 oho an, ne’ebé iha relasaun ba polítika rejistu nasionál (NRC) ne’ebé afeta ba sira nia psikolojia atu la hetan kredénsia nudár komunidade ida husi India.

“Ami sente polítika ne’e diskriminasaun boot no kontra direitu umanus tuir konvensaun internasionál ne’ebé India mós adopta”, afirma  Nasreen Habib.

Nasreen Habib nia avó-bizavón husi to’os na’in ki’ak  iha Benggla. Antes ne’e, sira hanesan sarani Kasta Hindu ne’ebé tama Islam atu bele sai husi sirkunstánsia moris ki’ak no diskriminasaun. Sira muda ba hela iha Distritu Assam iha tinan klaran 1920, nudár parte ida husi programa ‘Grow More Food kolonial.’

Sira hela iha Assam, Nasreen Habib haktuir, loron ba loron, sira komesa adapta ona ambiente moris no lisan komunidade Assam nian hodi haluha tiha sira nia orijen rasik. Sira nia oan no bei-oan sira komesa eskola  no aprende iha  Assam hodi tau sira nia-an hanesan ema Assam ho lingua Assam. Maibé, finalidade husi sira nia peregrinasaun mak tenke simu konsekuénsia hotu diskriminasaun nian no presaun husi majoritáriu no ukun na’in sira.

EKIPA

HAKEREK NO HATÁN

Please enter your comment!
Please enter your name here