Konferénsia imprensa vítima no família trajédia Kuluhun de Baixo. Foto TATOLI: Rafy Belo

DILI, (TATOLI) – Família no vítima trajédia Kulu-hun kraik hamutuk ho Rede Defensór Direitu Umanu (RDDU),  ezije ba governu atu halo tratamentu imediata ba sira-nia kondisaun saúde iha rai li’ur.

Kazu ne’ebé akontese iha domingu madrugada tuku 01.30, iha loron 18 fulan-novembru 2018 rezulta vítima sira hanesan Lúcio do Carmo-lakon rins karuk tanba hetan tiru, Teresinha Vila Nova Pacheco-liman ruin parte loos sai kle’uk no labele funsiona hanesan baibain hodi hala’o atividade hanesan estudante.

Nune’e mós Paulino de Jesus kanek iha liman loos no daudaun ne’e sente moras hela. Pinto Gama hetan tiru iha kotuk tama to’o pulmaun, to’o agora sei iha laran no mós Agripino da Costa vítima tiru iha kanoruk sai fali iha hasan.

Enkuantu vítima ne’ebé hetan tiru no iis kotu mak Erick Joni Roberto Bria, tinan 24 (kaben na’in); hetan tiru iha ulun fatuk, Luis Kevin Saldanha Belo, tinan 18 (klosan) no Leonildo Eduardo Ximenes Sequeira tinan 20 (klosan).

Vítima sira prefere trata sira-nia saúde iha rai li’ur, tanba tuir sira durante fulan haat ona ladún iha tratamentu sériu husi Ospitál Nasionál Guido Valadares (HNGV-sigla portugés) ho razaun falta ekipamentu no medikamentu hodi trata kazu espesífiku balun hanesan sira sofre hela ne’e.

“Ami husu ba Primeiru-ministru atu haree trajédia Kulu-hun Baixu atu hasai despaxu ida ba Ministériu Saúde imediatamente hodi haruka vítima na’in lima halo tratamentu iha ospitál rai li’ur hodi salva sira husi risku no situasaun sira ne’ebé sira hasoru”, ezije portavós RDDU, Palmira Soares, hamutuk ho família sira iha sala Asosiasaun HAK Faról, tersa (19/3).

“Ami nota katak moras ne’ebé vítima sira sofre agora, iha risku ba sira-nia vida kada oras no loron, nune’e ospitál nasionál presiza tau atensaun ba sira no di’ak liután bele halo tratamentu iha rai li’ur, maibé antes ne’e tenke iha uluk relatóriu junta médiku hodi la hatodan médiku sira iha ospitál”, reforsa tan portavós RDDU ne’e.

RDDU hamutuk ho vítima no família mós husu ba governu atu halo kompensasaun ba vítima no família vítima sira tanba konsidera kompensasaun nu’udar aktu ka medida prevensaun ida ba autoridade seguransa atu halo violénsia no halakon ema nia vida tuir sira-nia hakarak de’it ne’e bele asegura katak faluk no oan ki’ak sira la simu terus todan tebes iha sira-nia moris sein aman no la’en ida.

“Ami mós husu ba governu atu fornese nesesidade ba faluk no oan ki’ak sira ne’ebé nia aman husik hela, tanba oho husi membru PNTL (Polísia Nasionál Timor-Leste) iha trajédia Kulu-hun”, afirma.

Iha fatin hanesan, vítima Lúcio do Carmo hatutan nia la ezije ba governu atu fó osan maibé prefere troka fali nia rins ho foun, tanba nia nu’udar aman ida ba oan na’in tolu sei ki’ik, hodi bele halo serbisu, sustenta família.

Nune’e mós, Teresinha Vila Nova Pacheco, nu’udar mós vítima ida ba jornalista sira katak nia kondisaun agora sente la di’ak tanba moras no durante ne’e labele halo atividade sira no apoiu de’it husi família no alin sira iha uma.

“To’o agora liman sira metan hotu, sente hanesan ran mak la halai. Doutór dehan uat mak kotu. Ne’ebé, to’o agora ha’u-nia kondisaun seidauk di’ak, liman to’os hotu”.

Tanba ne’e, vítima Teresinha Vila Nova Pacheco insiste mós ba governu atu tau-matan lalais ba sira-nia kondisaun atu di’ak lalais no ida-idak bele hala’o sira-nia atividade.

Iha biban hanesan, Padrastu Luis Kevin Saldanha Belo, Doutór John Anaje, sidadaun timoroan juridikamente, hateten mós ba profisionál komunikasaun sosiál sira katak tenke halo duni tratamentu ba vítima sira nune’e labele prejudika sira-nia futuru tanba to’o agora seidauk iha solusaun di’ak ba vítima sira.

“Labele gasta tempu hanesan ne’e, to’o fulan haat, sira moris ho moras nafatin. Agora ami mós ezije ba Estadu, ne’e hanesan tempu naruk nian, ami hakarak Estadu halo re-kompensasaun; husi instituisaun PNTL nune’e labele akontese tan”, friza Doutór John Anaje.

Padrastu Luis Kevin Saldanha Belo katak sira presiza re-kompensasaun ba oan sira ne’ebé hetan tiru tanba iha rai hothotu bainhira situasaun sira akontese hanesan ne’e Estadu sempre selu kompensasaun.

Padrastu ne’e akresenta: “Inan faluk sira ne’e, tenke tanggung jawab (responsabiliza). Inan faluk sira ne’e, agora sé mak ajuda sira? Estadu tenke rezolve. Estadu rezolve sira-nia oan sira ba eskola, buat hotu kompletu. Agora, durante trajédia ne’e akontese, iha tiha ona promesa katak sira sei ajuda tuir responsabilidade morál. Agora fulan ne’e besik ona, ami seidauk rona buat ida husi PNTL kona-ba halo rate, serimónia fulan neen. Ida ne’e mós ami ezije atu rezolve lalais”.

Família vítima sira komprende katak oan sira ne’e sei la moris fali ona maibé importante situasaun kona-ba apoiu no re-kompensasaun.

“Ami la iha intensaun atu estraga Timór ka halo krime ida, tanba ami bele halo buat hotu, labarik sira sei labele moris fila fali. Ami lakohi polísia ida mate, ami lakohi povu ida mate tan, ami lakohi ema seluk tanis tanba trajédia tan”.

“Ami buka tuir lei no orden rai laran nian. Maibé, Estadu tenke halo sira-nia parte hodi rezolve kazu ne’e. Ba área justisa, ami fiar katak justisa sei la’o hela; prokuradór ne’ebé mak kaer kazu ne’e haree ami di’ak, fó informasaun hotu ba ami, ami fiar katak  área justisa sei la’o hela”, konklui John Anaje.

Rede Defensór Direitu Umanu (RDDU) kompostu husi organizasaun sosiedade sivíl hanesan Asosiasaun HAK, JSMP (Judicial System Monitoring Program), Ajar, AlFela, CBR-Nerworking, Belun, FUNDASAUN MAHEIN, CODIVA, AHMDTL no La’o Hamutuk, ne’ebé serbisu tau-matan ba dezenvolvimentu direitu umanu.

RDDU ne’e estabelese ho mandatu atu kontribui no tau-matan ba kazu alegasaun direitu umanu ne’ebé envolve membru forsa seguransa F-FDTL no PNTL.

RDDU relata dezde sira-nia ezisténsia to’o ohin loron rejista ona kazu alegasaun violasaun direitu umanu ne’ebé envolve membru Forsa Defeza no PNTL, hahú 2016 to’o 2018 maizumenus totál kazu rejistradu hamutuk 39 inkluindu kazu Kulu-hun Kraik ne’ebé akontese fulan haat ba kotuk.

Husi totál kazu sira ne’e, RDD haktuir sira nota kazu alegasaun violasaun direitu umanu sira ne’e kontinua la iha prosesu ida ne’ebé sériu atu nune’e bele iha kontabilidade ba violasaun sira ne’ebé akontese iha pasadu.

RDDU haree katak trajédia Kulu-hun Kraik hanesan krime ka violasaun kontinuasaun husi violasaun sira ne’ebé akontese iha pasadu ne’ebé seidauk iha prosesu justisa, kontabilidade ba autór sira ne’ebé envolve no komete krime sira ne’e. RDDU haree katak violasaun sira ne’e akontese tanba konsidera estadu rasik la sériu atu rezolve problema sira ne’e.

RDDU hamutuk ho vítima no família vítima sira tanba konsidera simu informasaun husi vítima no família vítima sira katak sente deskontente no lamenta ho razaun katak sente hanesan estadu/governu koko atu haluha no ignora vítima no família vítima sira hanesan timoroan ida ne’ebé sai vítima husi asaun ajente estadu-membru PNTL.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here