Logo UNTL.

DILI, (TATOLI) – Universidade Nasionál Timor Lorosa’e (UNTL) partisipa eventu Mobilidade Kréditu Internasionál (ICM-sigla inglés) ba tinan 2019 iha Portugal nu’udar nasaun membru plenu direitu ida iha Komunidade Nasaun Sira Ne’ebé Ko’alia Lian-Portugés (CPLP-sigla portugés).

Pro-reitór ba Asuntu Kooperasaun, Eduardo Aniceto Serrão, katak UNTL marka prezensa iha eventu internasionál ne’e tanba membru ERASMUS+, husi liña ACP (Africa, Caribbean no Pacific) nu’udar reprezentante iha husi Pasífiku nian.

“Meta importante husi programa ICM ne’e maka reinforsa Kooperasaun Internasionál hodi kontribui ba UNTL atu kumpre misaun hanesan instituisaun Ensinu Superiór Públiku ida”, refere mídia UNTL, Ajénsia TATOLI asesu, tersa (19/3).

Misaun UNTL nian mak promove ensinu ho eselénsia liuhusi programa akadémiku sira kompetitivu iha nivel nasionál no internasionál, fomenta prezervasaun, dezenvolvimentu no artikulasaun identidade no valór timoroan sira liuhusi promosaun istória, kultura no língua.

Fomenta atividade investigasaun ne’ebé bele kontribui ho forma kriadora ba dezenvolvimentu Timor-Leste no promove baze alarga ida iha partisipasaun interinstitusionál, ba integrasaun kultura sientífika oioin hodi kria sinerjia inovadora ba ensinu no investigasaun.

Inklui, presta servisu ho kualidade no diversifikadu ba komunidade hodi kontribui ho relevante ba dezenvolvimentu sosiál no kualifikasaun rekursu umanu no kontribui ba dezenvolvimentu kooperasaun internasionál no aproximasaun entre povu, liuliu iha domíniu edukasaun nian no koñesimentu, siénsia no teknolojia.

Enkuantu vizaun instituisaun akadémika públika ne’e mak forma no gradua nia estudante sira ho elevadu iha nivel intelektuál, predispostu ba peskiza no ba buska sientífika, prepara formandu sira ho valór umanus ne’ebé iha benefísiu ba konsiénsia nasionál no adota iha servisu sira afavór ba moris di’ak no prosperidade sidadaun nian nomós promove komprensaun, armonia no solidariedade entre kultura no povu.

Valór UNTL nian mak eselénsia, kriatividade no inovasaun, transformasaun no aprendizajen kontinua, lideransa, kolaborasaun no transparénsia no responsabilizasaun.

Profesór Eduardo Aniceto Serrão hato’o mós importansia husi programa ne’e mós atu hasa’e no estimula abilidade, empregabilidade nomós moderniza edukasaun, treinamentu no servisu ba juventude.

Durante eventu ICM, iha mós atividade kulturál kona-ba ba Trends no Estratéjia ba Internasionalizasaun, ho espetativa benefisia dirijente no tékniku universitáriu sira atu aumenta koñesimentu, abilidade, aprende língua Portugeza, koñese universidade sira seluk no haforsa kooperasaun entre instituisaun akadémika sira.

Eventu ICM organiza husi ‘Consortium Merging Voices’ ne’ebé kompostu husi Universidade Nova de Lisboa, Universidade do Porto, Universidade do Algarve no Universidade Trás-dos-Montes Alto Douro, ho ho finansiamentu husi Programa ERASMUS+.

Eventu refere inklui futuru treinamentu ba membru Seniór Universidade nian inklui profesór nomós tékniku administrativu sira, ne’ebé sei partisipa husi universidade sira husi nasaun membru ACP.

Partisipa iha ICM 2019 nian ne’e mak dirijente no tékniku universidade 12 husi nasaun 10, husi kontinente Áfrika nasaun 9, husi Caribbean 2, no husi Pacific mak reprezenta ho prezensa UNTL nian, durante loron 12 hahú sábadu (16/3); loron 3 iha Universidade Nova Lisboa, loron 3 iha Universidade Algarve, loron 4 iha Universidade do Porto no loron 2 iha Universidade Trás-dos-Montes Alto Douro.

Partisipante sira ne’ebé partisipa iha ICM reprezenta nasaun 10 ACP nian, inklui nasaun Cameroon, Dominican Republic, Ethiopia, Guyana, Madagascar, Seychelles, Tanzania, Uganda, Angola, Mozambique, Cabo Verde no Timor-Leste.

Jornalista: Rafy Belo

Editora: Rita Almeida

HAKEREK NO HATÁN

Please enter your comment!
Please enter your name here