DILI, (TATOLI) – Governu Irlanda liuhosi ninia Ministru Estadu Abitasaun, Planeamentu no Administrasaun Lokál, Damien English, ohin hasoru Primeiru-Ministru, Taur Matan Ruak, hodi hametin kooperasaun ho Timor-Leste ba futuru.

Ministru Abitasaun i Dezenvolvimentu Urbanu husi Irlanda, Damien English (karuk) bainhira hala’o enkontru ho Primeiru-Ministru, Taur Matan Ruak , iha Palásiu Governu, tersa 19 marsu 2019. Imajen António Goncalves

“Ami hakarak liután atu hametin lasu amizade hosi ha’u nia vizita traballu ida ne’e, hein no fiar metin katak ba oin liuhosi governasaun Primeiru-Ministru nian ami sei aumenta liután kooperasaun iha área barak”, dehan Damien ba jornalista sira iha Palásiu Governu hafoin hasoru malu.

Governante ne’e promete sei aumenta apoiu kooperasaun liuhosi fundu Irlanda nian ne’ebé oras ne’e residente iha Singapura.

Hatutan liután ohin sei hasoru malu ho reprezentante Nasaun Naklibur sira (ONU-sigla Inglés) iha Timor-Leste no Uniaun Europea atu haree di’ak liután kooperasaun saida maka Timor-Leste no Irlanda presiza atu estabelese.

“Durante loron hira ha’u nia estádia iha Timor Leste povu no governu Timor-Leste haree ha’u ho ha’u nia ekipa hare di’ak tebes-tebes”, dehan nia.

Durante hasoru malu ho ezekútivu, Damien English mós fahe esperénsia kona-ba luta povu Irlandia nian bainhira luta ba indepedensia ne’ebé ninia kazu atu hanesan ho istória Timor-Leste.

Kona-ba timoroan ne’ebé oras ne’e servisu iha Irlanda, nia realsa  sidadaun timoroan rihun ida resin maka oras ne’e servisu iha Irlanda Norte no Súl.

“Ami sorte tebes-tebes ho timoroan sira nia servisu ami bele aselera ami nia dezenvolvimentu país ninian”, salienta.

Nasaun rua iha ona kompromisu atu investe iha sistema polítika entre nasaun rua no mós sustentabilidade ba dezenvolvimentu nasionál, dezenvolvimentu ekonomia, edukasaun no agrikultura.

“Se iha vizita atu mai tan hosi Governu Irlanda ninian mai Timor-Leste no ami fiar metin katak Governu Timor-Leste mos sei haruka ninia reprezentante ofisiál ba hala’o vizita iha ne’eba, maibé bainhira ha’u fila ba Irlanda sei hato’o ba ha’u nia Primeiru-Ministru no sei hasoru malu ho timoroan no sira nia família ne’ebé oras ne’e servisu iha Irlanda”, dehan.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here