Reprezentante arte-marsiál husi PSHT, IKS no KORKA, Abilio Mesquita Mausoko, ko'alia ba jornalista sira hafoin hasoru Prezidente Repúblika, Francisco Guterres Lú Olo, iha Palásiu Prezidensiál Bairru Pité, tersa, (19/3/2019). Imajen Xisto Freitas

DILI, (TATOLI) – Reprezentante eis arte-marsiál hanesan Persaudaraan Setia Hati Terate (PSHT), Ikatan Kera Sakti (IKS) no Klibur Oan Rai Klaran (KORK) husu Governu atu altera lei númeru 5/2015 no rezolusaun númeru 16/2013 ne’ebé taka arte-marsiál.

“Prezidente Repúblika konvida ami atu rona ami nia hanoin no ami rona Prezidente Repúblika nia hanoin atu reativa hikas arte-marsiál inkluzivamente PSHT, IKS no KORK”, reprezentante eis arte-marsiál PSHT, Abílio Mesquita “Mausoko”, ba jornalista sira iha Palásiu Prezidente Nicolau Lobato, Bairru Pité, tersa ne’e hafoin hamutuk ho nia belun sira hosi IKS no KORK soru-mutu ho Xefe Estadu, Francisco Guterres Lú Olo.

Nia haktuir sira nia ezijénsia ne’e bazeia ba lider partidu polítiku sira nia promesa iha kampaña eleitorál tinan kotuk katak bainhira ukun sei reativa fali arte-marsiál.

“Ami ezije katak tenke altera lei númeru 5/2015 no rezolusaun númeru 16/2013 maka bele ko’alia kona-ba reativa fali arte-marsiál tolu ne’e”, nia dehan.

Mausoko hatutan bainhira reativa arte-marsiál ne’e la signifika membru maka tenke garante estabilidade maibé lei maka tenke garante.

“Ema ida halo sala, lei maka tenke kondena. Tenki halo fali lei ida ne’ebé rigorozu para bele haree arte-marsiál ne’e to’o iha ne’ebé. Nune’e ema ida halo sala karik la’ós arte-marsiál maibé individu”, argumenta.

Aleinde ne’e, reprezentante eis arte marsiál IKS, Silvestre Xavier Sufa, hateten sira prontu koopera ho Governu bainhira ezekutivu presiza sira nia ideia atu halo lei rigorozu ka kritéria rigorozu ba arte-marsiál sira.

“Arte-marsiál sira hanesan parte desportu Timor-Leste nian no reprezenta Timor-Leste ba rai liur. Tanba ne’e ami prontu kontribui ba pás no estabilidade”, afirma.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here