Membru Parlamentu Nasional. Imajen/dok.TATOLI

DILI, (TATOLI) – Parlamentu Nasionál  (PN), ohin konvida Ministru Obra Públika (MOP), Salvadór Eugénio Soares dos Reis Pires, halo diskusaun ba situasaun atuál iha rai-laran, liu-liu Dili, durante plenária.

Iha diskusaun opozisaun sira levanta problema inundasaun no presiza halo avaliasaun ba projetu drenajen sira.

Ministru Obras Públikas, Salvador Soares dos Reis Pires. Imajen António Goncalves

Ministru Salvadór Reis Pires admite drenajen hanesan prosesu kontinuidade. “Drenajen prosesu kontinuidade, la signifika governu tuan sira la halo, tanba dezenvolvimentu ne’e prosesu”, tenik.

Nia haktuir esforsu ne’ebé governu anteriór halo kona-ba drenajen iha 2015, V Governu Konstitusionál halo ona dezeñu no planu mestre ba drenajen iha Dili maibé bainhira hatama iha Tribunál Rekursu (TR) la-hetan aprovasaun, nune’e la konsege implementa.

Nune’e mós iha VI Governu halo kooperasaun ho Governu Portugal atu revee planu mestre no dezeñu detalladu ba drenajen. “Ida ne’e la’o hela no tuir planu atu implementa iha 2020 ba oin”.

Governante ne’e rekoñese kuandu tama impasse polítika kuaze tinan rua laiha manutensaun drenajen ezistente maibé agora bainhira iha ona Orsamentu Jerál Estadu (OJE) governu prevee ona osan ba projetu ne’e.

“Iha OJE 2018 ami  tau duni osan no bainhira ita tender (konkorsu) iha kompañia rua ne’ebé mak halo hela manutensaun esgotu iha Dili laran”, katak.

Deputadu Bankada FRETILIN, Maria Angélica Rangel, antes ne’e proukupa ho inundasaun loron hirak liubá tanba udan boot lori mós impaktu ba komunidade iha bairru hirak iha Dili laran.

“Iha OJE tinan-tinan ita aloka verba atu kontrola; hanesan inundasaun, mota sobu rai, lori ema nia uma no seluk tan maibé tanbasá sei akontese nafatin inundasaun?”, nia kestiona.

Jornalista: Julia Chatraina

Editora: Rita Almeida

HAKEREK NO HATÁN

Please enter your comment!
Please enter your name here