Andreas Harsono, peskizadór Human Rights Watch Indonesia. Imajen/Francisco Simões

BALI, (TATOLI)—Publikasaun media sira, inklui atividade jornalizmu iha Indonézia barak mak sei dauk hatudu sira nia imparsialidade. Tanba ne’e, media sira Indonézia barak mak prodús notísias la iha objetividade no hatudu sira tendénsia ba grupu polítika balun, figura polítika balun no hamosu diskriminasaun iha sosiedade.

Andreas Harsono, peskizadór  Human Rights Watch Indonézia, afirma katak, liberdade imprensa iha Indonézia di’ak ona kompara ho tinan sira rejime Orde Baru nian, maibé preokupasaun boot ne’ebé sai atensaun boot ba sosiedade Indonézia mak publikasaun media sira ne’e barak sei tendensiozu no la “objective”, la balansu no hamosu diskriminasaun iha sosiedade.

Liu husi aprezentasaun ho tópiku “Liberdade Relijiaun” husi perspetiva direitus umanus iha Semináriu no Workshop Rejional ba Jornalista ba loron daruak nian, ohin, iha Otél Ayodya,  Bali, Andreas Harsono, hateten, iha tempu sira konflitu no intimidasaun kontra direitu umanus ne’ebé akontese iha Indonézia,  media barak publika haree liu ba sentimentu relijiaun nian. Tanba ne’e, minoria sira ne’ebé liberdade ne’ebé prezodikadu husi desizaun podér polítiku sira ou aktu husi Ormas (Organisasi Masyarakat)  sira maioria  nian, kuaze la iha media mak sai hanesan lian ba lian laek sira husi grupu sosiedade minoria.

Andreas Harsono, foti  ezemplu kazu iha pasadu kontra umanidade  iha tinan 2008 anti ormas Islam Ahmadiyah, intimidasaun sira ne’ebé lansa husi ormas maioria hasoru relijiaun minoria sira, kuaze  la kobre ho rigor no la balansu. Ironia liu, Andreas afirma tan, vítima barak husi konflitu no intimidasaun sira ne’e nunka hetan fatin iha media sira nia publikasaun.

Nia afirma mos iha kazu kontra direitus umanus lubuk ida mak akontese iha Indonézia  liga ho liberdade relijiaun nian, mas media sira Indonézia nian ladún fó espasu hanesan ba relijiaun minoritáriu sira.  Maioria husi media no jornalista sira hakerek no publika de’it mak atividade husi maioria nian no polítika maioria nian.

Iha nia aprezentasaun hatudu konflitu, intimidasaun no diskriminasaun, ne’ebé lansa husi grupu maioria hasoru minoria, inklui  intimidasaun kontra diretu grupu trans gender (LGBT-siglaIngles).

Seluk fali, nia dehan, desizaun kona-ba “Hijab” iha Aceh, Kalimantan no rai balun tan iha Indonézia tuir loloos kontra direitus umanus, maibé media sira la kritiku. Tanba polítika no ideolojia “hijab” ne’e tuir loos la’ós obrigatóriu, tanba depende ba konsiénsia indivíduu ida-idak nian.

“Hijab” ne’e ropa ne’ebé ema musulmanu (Islam) sira hatais ho intensaun atu taka sira nia isin lolon tomak, husi ulun to’o ain sama rai (penutup aurah). Pior liu tan, nia hateten, polítika “hijab” ne’e obriga ema hotu iha Kalimantan ho Aceh tenke tau. La haree ba nia Islam, hindu, Budah ou Kristen.

Exeplu seluk, Andreas hatutan, kona-ba diskriminasaun mak ema ne’ebé la’os  Islam ladun iha liberdade hanesan ho ema Sunni Islam seluk, se kuandu iha oportunidade serbisu ruma iha ONG no repartisaun Estadu nian mós kuandu nia kartaun identidade ruma  hakerek nia relijiaun la’ós Islam, difisil atu bele hetan serbisu.

Kona fali ba publikasaun kazu Gafatar nian ne’ebé akontese iha Indonézia tuir loloos la’ós sekte ou rejiaun at. Maibé ne’e hanesan movimentu sosiál ne’ebé mak envolve ema barak no estabelese iha fatin barabarak mai husi relijiaun oi-oin, inklui Islam rasik. Maibé, media sira la rigor no la “objective” iha nia reportajen hodi kondena fali grupu ne’e iha públiku hodi dehan, ajaran sesat, aliran sesat no seluk-seluk tan, ne’ebé nia implikasaun  halo membru barak sai vítima intimidasaun no diskriminasaun.

Gafatar, hanesan organizasaun movimentu ida ne’ebé ni membru barak no espalla iha territóriu Indonézia hodi hala’o serbisu komunál iha area agrikultura nian no atividade sosiál iha komunidade nia leet, ne’ebé la dependénsia ba governu ka estadu Indonézia.

“Iha rai sira ne’ebé sai baze ba grupu Gafatar lori ksolok ba povu sira, tanba sira hanorin ema serbisu komunál (halo natar no  halo to’os) ho rezultadu ne’ebé fo satisfasaun ba povu agrikultór sira, no atividade sosial balun mak halo uma ba povu kbiit laek. Maibe tanba la iha koordenasaun no sira la hakru’uk ba orientasaun Estadu nian ne’e mak sai preokupasaun”, hateten partisipante ida iha semináriu no workshop rejionál ba jornalista Sudeste Aziátiku.

Observasaun husi Andreas Harsono, peskizadór  Human Rights Watch Indonézia  katak, husi kazu sira kontra umanidade ne’ebé publika iha media sira Indonézia nian barak mak la kumpri ba elementu sira Bill Kovach no Tom Rosentiel nian. Balun mós komete bei-beik infrasaun ba kede étika jornalista Indonézia nian rasik.

Iha dada lia ho jornalista balun husi Indonézia ne’ebé partisipa iha semináriu no workshop ho tema “The Nexus between Freedom of Religion or Belief and Freedom of Expression in Southeast Asia” ne’e, rekoñese katak, independénsia editorial iha Indonézia mós sai dezafiu ba profisionál jornalista sira, tanba komesa iha ona intervensaun direita no indireta husi podér polítiku, podér ekonómiku no media na’in sira ba  sira nia interese.

Husi sorin seluk, membru Konsellu Imprensa Indonézia nian (DPI/Dewan Pers Indonesia) balun, inklui sesepuhjornalista sira nian ne’ebé ativu hela nudár formadór area jornalizmu nian iha Lembaga Pers Dr. Soetomo (LPDS), Jakarta, rekoñese mós katak,  ikus-ikus ne’e, liuliu iha tinan polítika ne’e, bele haree momoos media ne’ebé mak apoia ba kór polítiku  ida ne’ebé.

“Iha Indonézia, ami sempre uza terminolojia mean ho azúl, katak mean ne’e pro- koligasaun PDIP (Partai Demokrat Indonesia Perjuangan) no azúl ne’e la seluk-la leet pro-koligasaun Partai Demokrat (PD). Iha Indonézia, ita bele haree momoos media sira halai ba azúl ka mean”, hateten membru sira DPI nian bainhira dada lia kona-ba liberdade imprensa ho Konsellu Imprensa Timor-Leste, foin lalais ne’e, iha Edifísiu DPI, Jakarta.

“Ko’alia kona-ba liberdade imprensa, tuir loloos ami moe ho Timor-Lest, tanba Timor-Leste nia ranking liberdade imprensa iha Sudeste Aziátiku di’ak liu ami Indonézia”, hateten korrespondente CNN Indonézia,  Mifah Fardl, ho hamnasa.

EKIPA      

HAKEREK NO HATÁN

Please enter your comment!
Please enter your name here