Atividade Parlamentu Nasionál. Dokumentasaun TATOLI

DILI, (TATOLI) – Parlamentu Nasionál (PN) liuhosi sesaun plenária tersa ne’e halo votu pezar ba falesimentu Eis-Senadór Austrália, Gordon McIntosh no mós akontesimentu atake iha Meskita Christchurch, Zelándia Foun.

Gordon McIntosh hakotu iis ho idade 93 iha loron 10 marsu 2019 iha Austrália. Entretantu, atake iha Meskita rua sidade Christchurch iha Zelándia Foun akontese iha loron 15 marsu 2019, ema na’in 50 lakon vida no 50 seluk kanek. Tuir dadus ofisiál indika vítima 30 sei halo tratamentu iha ospitál.

Votu pezar ba Gordon pasa ho a favór 43, kontra 0 no abstensaun 0. Enkuantu votu ba vítima sira iha Meskita Christchurch pasa ho a favór 42, kontra 0 no abstensaun 0.

Gordon McIntosh hanesan apoiante timoroan ba diretu auto determinasaun ba independénsia Timor-Leste no iha papél importante iha prosesu luta ba libertasaun.

McIntosh ou “Ulun To’os” naran ne’ebé hasai iha dékada 80 husi Forsa Armada Libertasaun Nasionál Timor-Leste (FALINTIL) ne’ebé mak admira ho Gordon nia “Ulun To’os”, la aseita opiniaun sira husi nia kolega iha Parlamentu Australianu durante vizita iha 1983.

Estadu kondekora ho Orden Timor-Leste iha 2014, tanba esforsu ba Timor-Leste nian independénsia.

Nia hanesan senadór iha parlamentu australianu husi Partidu Traballista entre 1974-1977, durante períodu ne’e lidera inisiativa oin-oin hodi fó apoiu ba kazu Timor-Leste.

Iha marsu 1975 realiza vizita dahuluk ba Timor-Leste, hodi integra delegasaun Caucus Partidu traballista.

Hanesan membru no prezidente ikus husi Komisaun Inkéritu Senadu kona-ba Direitu ema-nian no konsidera povu Timor-Leste entre 1982-1983.

Maria Angélica Rangel hateten McIntosh hanesan senadór ne’ebé úniku kuandu mai halo delegasaun iha tinan 1982 iha Dili hafoin fila delegasaun parlamentár ne’e ba relata situasaun ne’ebé la-hanesan husi situasaun ne’ebé mak sira haree.

“McIntosh konta no kestiona desizaun ne’ebé mak sira hato’o iha sira nia nasaun, nune’e mós nia kontra desizaun partidu traballista rasik mak dehan. Ida ne’e hatudu ba ita katak ema ida bele fó solidariedade ba nia maluk ne’ebé mak terus iha okupasaun, liu-liu nia defende direitu umanu iha Indonézia sira nia tempu”, katak.

“Parlamentu Nasionál manifesta ba aktu bárbaru ne’ebé rezulta vítima no lian barak mak mundu tomak kondena. Parlamentu Nasionál espresa votu pezar ba vítima husi masakre ne’e no solidariedade ba família vítima iha Nova Zelandia”, refere deklarasaun votu PN ne’ebé lee husi Sekretária Meza, Maria Teresinha Viegas.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here