Ministru Abitasaun i Dezenvolvimentu Urbanu husi Irlanda, Damien English (karuk), bainhira hasoru Prezidente Repúblika, Francisco Guterres Lú Olo, iha Palásiu Prezidensiál Bairru Pité, tersa, (19/3/2019). Imajen António Goncalves

DILI, (TATOLI) – Ministru Estadu Abitasaun no Dezenvolvimentu Urbana Repúblika Irlanda, Damien English TD, hateten sente onradu tebes hala’o enkontru ho Prezidente Repúblika, Francisco Guterres Lú Olo.

“Hanesan membru governu hosi Repúblika Irlanda ninian sente onradu teb-tebes, tanba bele mai hasoru malu ho Prezidente Repúblika hodi mai kumprimenta Prezidente Repúblika no mós atu reinteira lasu nasaun rua entre RDTL no Repúblika Irlanda”, Damien ba jornalista sira iha Palásiu Prezidente Nicolau, Bairru Pité, tersa ne’e hafoin enkontru ho Xefe Estadu.

Nia esplika vizita ne’e atu enrikese kooperasaun entre nasaun rua, liu-liu mai diretamente haree progresu sira ne’ebé durante ne’e povu Timor-Leste atinje.

“Durante loron rua ha’u iha ne’e haree katak dezenvolvimentu nasaun ne’e la’o maka’as loos. Tanba ne’e ohin ha’u mós ko’alia ho Prezidente Repúblika atu reinteira dala ida tán nasaun rua ne’e nia kooperasaun dezenvolvimentu tuir mai”, afirma.

Governante ne’e salienta bainhira ko’alia ho Prezidente Repúblika, nia rasik mós esplika ba Prezidente Repúblika katak Repúblika Irlanda hasoru dezafiu hanesan mós dezafiu ne’ebé povu Timor hasoru no ultrapasa situasaun ida difísil ba faze ida dezenvolvidu.

“Horsehik mós hasoru malu ho Ministériu Negósiu Estranjeiru no Kooperasaun TL ko’alia uituan kona-ba progresu serbisu entre nasaun rua no hakarak aumenta liu-tán área kooperasaun liu-liu investimentu iha ema no atu amenta liu-tán área edukasaun hosi fundu Irlanda ninian iha Timor-Leste”, nia tenik.

Jornalista: Xisto Freitas

Editora: Rita Almeida

HAKEREK NO HATÁN

Please enter your comment!
Please enter your name here