Ministru Justisa, Manuel Cárceres da Costa. Imajen/ Egas Cristovão

DILI, (TATOLI) – Konsellu Koordenasaun Justisa, ohin halo diskusaun kona-ba pedidu indultu, komutasaun pena no liberdade kondisionál hosi Prezidente Repúblika, Francisco Guterres Lú Olo, ba dadur sira durante selebrasaun loron restaurasaun 20 maiu no 28 novembru tinan ne’e.

“Ha’u haktuir ba konsellu katak Prezidente Repúblika através Primeiru-Ministru bolu ha’u ba Ai-tarak laran ko’alia kona-ba oinsá atu fó indultu ba maluk prizioneiru sira ne’ebé iha direitu atu hetan hosi Prezidente, oinsá atu halo komutasaun pena hodi hamenus tinan kastigu no liberdade kondisionál”, katak Prezidente Konsellu Koordenasaun Justisa atuál Ministru Justisa, Manuel Cárceres da Costa, ba jornalista sira ninia kna’ar fatin Kaikoli.

Konsellu ne’e kompostu Ministériu Justisa, Prezidente Tribunál Rekursu, Prokuradór Jerál Repúblika, Defensoria Públika, Diretór Nasionál  Polísia Servisu Investigasaun Kriminál (PSIK), reprezentante advogadu Timor-Leste.

“Ohin ami diskute ona kona-ba asuntu ne’e  no konkorda ona katak ha’u sei fahe fali lista  prizioneiru hotu kona-ba sira nia tinan ne’ebé kumpre ona  no krime saida, pena tinan  hira ba tribunál rekursu no tribunál sira para juis sira no prokuradór kna’ar hodi hasai konkluzaun ba sira ne’ebé atu hetan indultu”, ministru realsa.

Juis no prokuradór maka sei hasai konkluzaun ba dadur sira, depois maka sei haruka lista indultu ba Prezidente Repúblika hodi prosesa, nune’e iha 20 maiu 2019 balun hahú hetan perdaun.

Enkuantu tribunál no ministériu públiku maka sei prosesa dadur sira ne’ebé maka hetan komutasaun pena no liberdade kondisionál.

Hatán kona-ba eis governante balun hetan indultu, ministru ne’e hatete to’o agora seidauk iha lista hodi fó indultu.

Entretantu, ministru afirma simu ona pedidu barak hosi proponente sira ne’ebé husu atu fó indultu ba sira nia kliente.

“Iha ona pedidu barak tama iha gabinete ministériu justisa ha’u despaxa ona ba diresaun servisu prizionál no reinsersaun para atu haree pedidu hirak ne’e tuir lei haruka”, dehan nia.

Lei númeru 5/2016 proponente ba indultu, komutasaun pena ne’e mai hosi proponente sira hanesan advogadu, defensór públiku, família kondenadu no kondenadu rasik.

Kritéria atu hetan indultu, komutasaun pena no liberdade kondisionál ne’e haree problema sosiál hanesan saúde, kondisaun ekonomia família depois kumpre pena, komportamentu di’ak hodi kumpre regulamentu no regra prizaun, halo tuir orden guarda komarka, tuir oráriu, implementa atividade hotu inklui kria kooperasaun ho maluk dadur sira.

Entretantu, iha kapítulu II artigu 85.o alínea I konstituisaun RDTL kona-ba kompeténsia rasik hosi Prezidente Repúblika hatete rona tuir Governu, atu fó perdaun ka hamenus kastigu.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here