Ministru Obras Públikas, Salvador Soares dos Reis Pires. Imajen Egas Cristovao

DILI, (TATOLI) – Ministru Obra Públika, Salvadór Eugénio Soares dos Reis, hateten eletrisidade ne’ebé mate kalan ikus-ikus ne’e tanba falta manutensaun rutina, maske nune’e nia admite Governu kontinua hadi’a sistema distribuisaun eletrisidade.

“Preokupasaun eletrisidade mate lakan, problema ne’e normálmente tinan-tinan tenke iha manutensaun. Manutensaun ida mak tenke hamoos ai sira, iha 2018 ita tenta halo no kontinua halo nafatin, alende melloramentu sistema liña distribuisaun, liuliu iha Dili”, tenik iha debate entre Governu ho deputadu sira iha plenária, tersa ne’e.

Nia hatutan: “Ita troka ona torre tuan iha Indonézia nia tempu maibé torre barak mak seidauk troka no prosesu kontratu komesa tinan 2016 atu halo melloramentu distribuisaun iha Dili laran, la’o tiha hafoin hetan difikuldade. Durante tinan rua nia laran laiha pagamentu tanba orsamentu laiha, ida ne’e realidade katak melloramentu infraestrutura ne’e rasik seidauk hotu”.

Governante ne’e dehan tan agora daudaun extende tan kontratu hodi kompañia sira komesa la’o, nune’e bele kontinua instala ai-riin no fiu eletrisidade iha Dili laran, hodi troka infraestrutura ne’ebé tuan iha tempu Indonézia nian.

“Falta manutensaun iha tempu barak, ikus mai VIII Governu lori todan hanesan transformadór rebenta, koneksaun ilegál, transformadór ne’ebé loloos nia kapasidade atu sustenta ligasaun; ezemplu ba uma kain lima de’it maibé tanba koneksaun ilegál kontadór pre-pagu laiha iha tempu badak entaun nia load (karga) ne’e aumenta no halo transformadór keimadu”, katak.

Nune’e mós nia akresenta eletrisidade mate lakan tanba problema isolator komponente eletrisidade, ai-monu no inundasaun.

Alende ne’e avaria ba eletrisidade lori tempu atu hadi’a, tanba agora daudaun laiha sistema automatizasaun

“Kuandu ahi mate iha liña ne’ebé mak naruk husi fornesimentu Bekora to’o Komoro, ekipa tékniku EDTL la’o ho lampra hodi leno fizikamente, ida ne’e mak sistema ezistente.

Nia dehan tan: “Ami nia esforsu mak mobiliza ekipa tékniku sira atu servisu lalais”.

Jornalista: Julia Chatarina

Editora: Rita Almeida

HAKEREK NO HATÁN

Please enter your comment!
Please enter your name here