Foto SS.

DILI, (TATOLI) – Prezidente Institutu Nasionál Seguransa Sosiál, Longuinhos Armando, informa rejistrasaun ba rejime kontributivu Seguransa Sosiál (SS) iha Institutu Nasionál Seguransa Sosiál husi setór públiku to’o ohin loron hamutuk 66.505.

“Ne’e funsionáriu públiku nian, agora, setór privadu iha 879. Se balun rejista tan ona funsionáriu bele to’o ona rihun 70 no funsionáriu (setór privadu) bele liu rihun resin ona”, Longuinhos afirma iha Kaikoli, ohin.

Bainhira sura ba persentajen, nasionalidade timoroan ne’e porsentu 97 no estranjeiru porsentu 2,23 ne’ebé rejista ona.

Tanba ne’e labele kria konta bankária ba ida ne’e, maibé osan ne’e tau iha konta bankária SS ne’ebé iha banku no INSS maka jere osan ne’e.

“Sistema Seguransa Sosiál iha mundu ne’e iha rua, ida naran sistema kapitalizasaun no ida repartisaun. Kapitalizasaun, ha’u-nia osan ha’u rai depois aban bainrua ha’u dada, agora, sistema repartisaun ita hotu-hotu tau iha fatin ida depois ita presiza ona, hasai (ezemplu maka SS ne’e)”.

Prezidente fó ezemplu bainhira ema ida mate entaun tenke selu nia pensaun mate nian ou reforma ona selu pensaun vellise nian.

“Ne’ebé ita la’ós kria ema ida nia konta iha banku kona-ba porsentu 4 ka 10. Osan hotu tama ba iha Seguransa Sosiál, iha banku ne’e só iha Seguransa Sosiál maka iha konta ida de’it tanba ne’e maka bolu dehan repartisaun, ita hotu-hotu hatama osan iha konta ida ne’e, depois sé maka presiza mai reklama ami analiza hasai gia orientasaun ida ba banku selu”.

Jornalista: Maria Auxiliadora

Editora: Rita Almeida

HAKEREK NO HATÁN

Please enter your comment!
Please enter your name here