Bispu Dioseze Dili, Don Virgilio do Carmo da Silva SDB, tula liman ba frater na’in lima ne’ebé simu ordenasaun diakonál iha Igreja Katedrál Dili, tersa, (19/3/2019). Imajen Egas Cristovão

DILI, (TATOLI) – Bispu Dioseze Dili,  Don Virgilio do Carmo da Silva, SDB ohin fó ordenasaun  Diakonál ba Frater na’in lima hosi kongregasaun Fransiskanu no Carmelita hanesan  frater Eugénio Rdentor Marques Caunan Lafo, Hermegildo Sarmento OFM CAP, Carlito Teti Laca, Roberto Lafu OFM Cap no Mariano Maia, iha Igreja Katedrál.

Misa ordenasaun ne’e mós komemora tinan ba dala tolu ordenasaun episcopal Bispu Dioseze Dili, Don Virgilio do Carmo da Silva SDB.

Amu Bispu iha ninia omilia husu ba bibi atan na’in lima atu banati tuir ezemplu São José ne’ebé nakonu ho fidelidade no haraik aan hodi haklaken Maromak nian Gloria ba ema hotu.

“Aprende nafatin ezemplu fidelidade no simplisidade hosi São José”, apela Bispu durante selebrasaun misa .

Knaar nu’udar diákonu maka serbí ho espíritu haraik aan no laran luak hodi haklaken Maromak ninia lia-fuan no Gloria ba ema hotu.

“Imi na’in lima atu halo duni knaar ne’e ho hananu ida atu fó Gloria ba Maromak”, tenik bibi atan Dioseze Dili ne’e.

Nune’e mós apela ba família sarani uma kain sira iha Timor-Leste atu moris iha fidelidade no simplisidade tuir ezemplu São José, tanba realidade ohin loron família barak maka laiha ona fidelidade no haraik aan ba malu.

Entretantu, Fr. Carlito Teti-Laca moris iha Fatumakerek, Laklubar, Munisípiu Manatutu iha loron 6 jullu 1987, FR. Eugénio Rdentor Marques Caunan Lafo  moris iha Numbey Oekusi iha loron 17 abril 1987.

Frater Frei Hermegildo Sarmento OFM Cap moris iha suku Manufahi iha loron 25 abril 1984, Mariano Maia moris iha Goulolo Letefoho , munisipiu Ermera iha loron 16 jullu 1988 no Fr, Frei Roberto Lafo OFM CAP moris iha Haemnano Suku Abani Oekusi iha loron 1 setembru 1984.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here