Diretór Jerál SEFOPE, Paulo Alves. Imajen Egas Cristovão

DILI, (TATOLI) – Timoroan rihun rua sei hahú formasaun lian-Korea iha fulan oin hodi  responde pedidu Governu Korea  Súl ne’ebé sei emprega traballadór rihun rua kada tinan.

“Loron rua (segunda to’o tersa ohin ) faze ita fahe númeru de’it, depois sira mai halo rejistu”, dehan Diretór Jerál Sekretariu Estadu Formasaun Profisionál no Empregu (SEFOPE), Paulo Alves, ba TATOLI iha Jináziu, ohin.

Konkorrente sira tenke prienxe kritéria hosi SEFOPE hanesan sidadaun timoroan hosi idade 19 to’o 39 ho kartaun eleitorál, billete identidade, kartaun evidénsia hosi SEFOPE  no dokumentu sira seluk.

Nia dehan liután SEFOPE distribui númeru rejistu ba timoroan hotu pur-volta rihun hitu depois sei iha selesaun dokumentu no tuir teste hodi hili kandidatu rihun rua tuir formasaun iha Dili.

“Formasaun tuir loloos ita hahú ona iha marsu, maibé prosesu ne’e tarde entaun ita hahú iha inísiu abril ou meadu abril”, haktuir.

Tuir planu SEFOPE sei hahú formasaun lian Korea ba formandu sira iha inisiu abril to’o outobru 2019.

“Ami mós fó hatete ba sira tenke disiplina, labele involve iha krime no saúde di’ak, involve iha krime ami sei hasai, laiha toleránsia tanba difikulta timoroan seluk atu ba servisu iha Korea Súl”, realsa.

Problema sala aprendizajen difikulta SEFOPE atu simu formandu sira liu rihun rua, tanba ne’e iha 2019 simu de’it rihun rua depois maka kontinua rekruta tan.

Entretantu, formasaun lian-Korea paradu durante 2017 to’o 2018 tanba impase polítika ne’ebé akontese iha rai-laran.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here