Partisipante ho oradór prinsipál sira foto hamutuk iha serimonia abertura semináriu no workshop ba Jornalista Rejiaun Sudeste Aziátiku, iha Otel Ayodya, Nusa Dua, Bali, Segunda (18/3/2019). Imajen/Francisco Simões

BALI, (TATOLI)—Oradór prinsipál sira ho mós partisipante sira ba Semináriu no Workshop Rejionál  ba Jornalista Sudeste Aziátiku (Southeast Asia), kondena maka’as aktu terrorizmu ne’ebé hamosu  ema ua’in mate iha Nova Zelándia, foin lalais ne’e.

Liu husi abertura semináriu no workshop internasionál ne’ebé hala’o iha Otél Ayodya, Nusa Dua, Bali-Indonézia, ohin,  reprezentante Ministériu Estranjeiru Indonézia nian  ne’ebé sai oradór prinsipál, Abdul Rahman, konvida partisipante hotu, inklui oradór sira, halo “um minutu silénsiu” hodi hasa’e orasaun ba vítima sira atentadu brutalizmu ne’ebé lansa husi terrorista sira  ba Mesquita Al Noor ho Mesquita Linwood iha sidade Christchurch, Nova Zelándia, foin lalais ne’e.

“Ami Indonézia hato’o ami nia solidariedade no kondolénsia profundal ba família vítima atentadu trájiku umanidade ne’ebé kontra direitus umanus. Tanba ne’e, depois loron ida atentadu, ami nia Estadu manifesta ami nia lamentasaun liu husi deklarasaun ba imprensa  hodi kondena atentadu estremizmu ne’e”, afirma Abdul Rahman, hodi haktuir mensajen Ministra Estranjeiru Indonézia, Retno Marsudi nian ba abertura semináriu no workshop rejionál ba jornalista ho tema “The Nexus between Freedom of Religion or Belief and Freedom of Expression in Southeast Asia.”

Semináriu no workshop ne’ebé partisipa husi reprezentante jornalista no freelance media komunikasaun sosiál husi nasaun sira Sudeste Aziátiku ne’e hala’o durante loron tolu (3), hahú husi loron 18 to’o loron 20 fulan Marsu, tinan ne’e.

Governu  Indonézia liu husi ninia Ministériu Estranjeiru hato’o apresiasaun no benvindu ba partisipante hotu ho esperansa katak, semináriu ida ne’e bele la’o ho di’ak no bele introdús ba malu  oinsá mak jornalista ho media sira bele kontribui ba promove liberdade espresaun no liberdade relijiaun iha rejiaun Sudeste Aziátiku .

Semináriu no workshop ne’ebé organiza husi SEJUK (Serikat Jurnalis untuk Keberagaman) no The International Association of Religion Journalists (IARJ) no Institute for Peace and Democracy (IPD) ne’e, ko’alia mós kona-ba issue diskriminasaun, intimidasaun  no  violénsia ba jornalista sira bazeia ba  relijiaun.

Endy Bayuni, nudár Diretór Ezekutivu International Association of Religion Journalists (IARJ), I Ketut Putra Erwan, nudár Diretór Ezekutivu of Institute for Peace and Democracy (IPD) Bali-Indonézia no mós Michael Suhr, nudár espesiál reprezentativu ba Freedom of Religion or Belief Ambassador, Royal Danish nian, liu husi serimónia abertura, hato’o mós sira nia apresiasaun ba atividade importante ida ne’e ho esperansa katak, semináriu no workshop ba jornalista rejiaun Sudeste Aziátiku   bele hamosu konkordánsia ida atu jornalista sira bele kontribui ativa liu tan ba promove liberdade espresaun no liberdade relijiaun iha rejiaun ne’e.

Endy Bayuni, I Ketut Putra Erwan, ho Michael Suhr, mós hato’o sira nia neon kraik hodi kondena asaun terrorizmu iha Nova Zelándia no aktu terrorizmu sira seluk tan ne’ebé akontese iha mundu rai klaran, hodi hamosu vítima barak ba ema inosente sira.

Liu husi semináriu no workshop jornalista nian iha rejiaun Sudeste Aziátiku ne’e bele kontribui hamosu diskusaun interesante  kona-ba issue sira sosiál no relijiaun. Liuliu, esplora komunikasaun ba  kometimentu promove liberdade imprensa, liberdade espresaun no liberdade relijiaun.

Semináriu no workshop internasionál ne’e hetan apoiu husi  Embaixada Dinamarka ba Indonézia, Sasakawa Peace Foundation, Tifa Foundation, Fundasaun Asia, ho mós  Embaixada Kanadá no Misaun Permanente Kanadá nian ba Asian.

EKIPA

HAKEREK NO HATÁN

Please enter your comment!
Please enter your name here